Maður á Norðurlandi hlaut vægan dóm í Héraðsdómi Norðurlands eystra fyrir ofbeldi gegn barnsmóður sinni, en dómur var kveðinn upp í máli hans þann 12. desember síðastliðinn.

Maðurinn var ákærður fyrir líkamsárás og hótanir gegn sambýliskonu sinni og barnsmóður. Ákært var vegna atviks sem átti sér stað 20. mars 2024. Réðst hann á konuna á sameiginlegu heimili þeirra og ýtti við henni nokkrum sinnum þar sem hún sat í hnipri á eldhúsgólfinu þannig að hún féll við.

Konan stóð upp og kýldi manninn á gagnaugað og beit hann. Ákærði svaraði með því að kýla konuna með krepptum hnefa í andlitið og tók um hana þannig að hún féll á sófann í stofunni. Tók hann þá með báðum höndum um háls hennar og hélt henni fastri í kyrkingartaki í um fimm sekúndur. Á meðan þessu stóð sagði hann við hana: „Þú ert að fara að deyja núna.“

Maðurinn játaði brotið fyrir dómi og hlaut þriggja mánaða skilorðsbundið fangelsi. Hann þarf að greiða konunni 500 þúsund krónur í miskabætur en hún krafðist þriggja milljóna.

Dóminn má lesa hér.