„Það verður ekki innrás. Það mun ekki gerast,“ sagði Claudia Sheinbaum, forseti Mexíkó, nýlega á fréttamannafundi að sögn Wall Street Journal.
Þrátt fyrir þessa fullyrðingu hennar, þá hafa margir valdamiklir Repúblikanar, þar á meðal verðandi þjóðaröryggisráðgjafi Trump, gert hernaðaraðgerðir gegn eiturlyfjahringjunum í Mexíkó að umræðuefni hvað eftir annað.
Ræða, sem Trump hélt nýlega, hefur orðið til þess að viðvörunarbjöllur hringja í Washington D.C. og Mexíkóborg.
Í kosningabaráttunni var eitt helsta áherslumál Trump að hann vilji stöðva flæði fentanýls inn í landið. Þetta banvæna efni hefur á síðustu áratugum valdið skelfilegum faraldri í landinu og orðið fleirum að bana en nokkuð annað fíkniefni. 2023 létust 76.000 af völdum ofneyslu efnisins samkvæmt tölum frá bandarískum yfirvöldum.
Valdamikil glæpasamtök og eiturlyfjahringir fara með völdin í um þriðjungi Mexíkó að sögn Wall Street Journal sem segir að nær útilokað sé að greina á milli yfirvalda og glæpagengjanna sem berjast hvert við annað um yfirráð yfir landsvæðum og smyglleiðum fíkniefna.
Talið er að 200.000 Mexíkóar hafi verið drepnir á síðustu sex árum í átökum glæpagengja og að um 50.000 hafi horfið sporlaust.
Bandarísk yfirvöld segja að megnið af því fentanýli, sem er notað í Bandaríkjunum, komi frá Mexíkó.
Á fyrri forsetatíð sinni viðraði Trump hugmyndir um að skjóta flugskeytum á framleiðslustaði fíkniefna í Mexíkó en að sögn tókst Mark Esper, þáverandi varnarmálaráðherra, að tala hann af þessu.
Í kosningabaráttunni síðasta haust sagðist Trump vilja beita hernum gegn mexíkóskum eiturlyfjahringjum til að koma í veg fyrir flæði fíkniefna yfir landamærin. Hann hét því einnig að setja eiturlyfjahringina og leiðtoga þeirra á lista yfir erlenda hryðjuverkamenn. Á þessum lista eru fyrir samtök á borð við Hamas og al-Kaída.
Spænska dagblaðið El Pais segir að Trump hafi nýlega endurtekið þessa ósk sína um að setja eiturlyfjahringina á lista yfir hryðjuverkasamtök. Þetta hefur vakið upp meiri áhyggjur af að hann muni gera alvöru úr loforðum sínum um að senda bandaríska hermenn inn í Mexíkó.
Fram að þessu hefur þótt óhugsandi að bandarískir hermenn sinni verkefnum í Mexíkó og á pólitíska sviðinu liggur rauð lína í þessu samhengi.
Niðurstöður skoðanakannana hafi þó sýnt að meirihluti Mexíkóa, sérstaklega á svæðum þar sem ofbeldisaldan af völdum eiturlyfjahringjanna er verst, myndu fagna því ef bandarískir lögreglumenn eða hermenn kæmu til landsins til að stöðva ofbeldisölduna.
