Hinn landsþekkti hestaíþróttamaður, Sigurbjörn Bárðarson, var á laugardagskvöld vígður inn í heiðurshöll ÍSÍ. Er hann 26. íþróttagoðsögnin sem hefur verið tekin inn í heiðurshöllina.
Sigurbjörn á lengri keppnisferil sem íþróttamaður í fremstu röð hér á landi en nokkur annar. Hann hefur keppt í öllum greinum hestaíþrótta í 57 ár, er margfaldur Íslands- og heimsmethafi í skeiðgreinum, hefur 13 sinnum unnið til gullverðlauna á heimsmeistaramótum og unnið yfir 120 Íslandsmeistaratitla. Einnig hefur hann sigrað í flestum greinum Landsmóta, nú síðast árið 2022, þá 70 ára gamall.
Þegar Sigurbjörn hafði tekið við viðurkenningunni á samkomu íþróttafréttamanna í Hörpu, þar sem íþróttamaður ársins var útnefndur, flutti hann þakkarræðu sem var afar litrík og áhrifamikil.
„Draumar geta ræst, maður er eiginlega meyr og orðinn klökkur nú þegar. Að hljóta þann mikla heiður að vera útnefndur í frægðarhöllina, fá þar sæti meðal okkar stórkostlegustu íþróttaafreksmanna er eitthvað sem mann getur dreymt um, en að það sé veruleikinn tekur langan tíma að átta sig á. Þessi útnefning er mikill heiður fyrir mig og hestaíþróttina á heimsvísu. Keppnisferill minn sem hestaíþróttamaður telur 57 ár, ég hef því lifað tímana tvenna og orðið vitni að þeim gífurlegu breytingum sem hafa átt sér stað innan íþróttagreinarinnar,“ sagði Sigurbjörn meðal annars.
Sigurbjörn greindi frá því að hann hefði orðið fyrir einelti í æsku en eineltisseggirnir fengu líka að kenna hörku hans:
„Ég ólst upp í stórri fjölskyldu, þar sem ást og hlýja var í fyrirrúmi en lítil efni. Maður varð að læra og komast af og standa á sínum eigin fótum. Mótlætið herti mann og kallaði fram keppnisskapið og það hefur fylgt mér allar götur. Fæddur rauðhærður og ég varð fyrir einelti, uppnefndur Rauðskalli Brennivínsson, og þá voru þeir sem það gerðu hlaupnir uppi og lumbrað á þeim. Þeim lærðist það fljótt að lengja kallfærið úr 20 metrum í 100 metra og skapa sér flóttaleið. En það dugði ekki til, það má segja að þarna hafi vegferðin fyrir alvöru hafist og keppnisskapið orðið til.“
Sigurbjörn tók saman það sem hafði mótað hann sem afreksmann: „Gott uppeldi, brjálaður keppnisandi, háleitar markmiðasetningar, draumar og gott heilsufar hafa haldið manni gangandi. Reglusemin hefur kannski ekki spillt þar heldur.“
Ræðuna má heyra í heild á vef RÚV.
