Ungur maður var handtekinn við Dalshraun í Hafnarfirði skömmu eftir hádegi í gær eftir að hafa ógnað manni með hnífi. Brotaþoli var að leggja bíl sínum þegar ungi maðurinn settist inn í bílinn og bað ökumanninn um að skutla sér. Ökumaðurinn neitaði því og þá dró maðurinn upp hníf og hótaði að stinga ökumanninn.

Ökumaðurinn koma sér á undan á hlaupum en vopnaðir lögreglumenn komu á vettvang og handtóku hnífamanninn.

Að sögn Skúla Jónssonar, yfirlögregluþjóns á lögreglustöð 2 hjá Lögreglunni á höfuðborgarsvæðinu, er sá handtekni íslenskur maður, fæddur árið 2002. Hann sagðist í yfirheyrslum ekki muna eftir atvikinu en hann var undir áhrifum fíkniefna. Var hann látinn laus að lokinni yfirheyrslu.

„Hann var yfirheyrður seint í gærkvöldi og síðan látinn laus. Við fundum þennan hníf,“ segir Skúli í samtali við DV.