Óttast er að allir 64 sem um borð voru í vélinni hafi farist þegar hún lenti í árekstri við herþyrlu þegar hún var að koma inn til lendingar. Fjórir voru um borð í herþyrlunni sem var í æfingaflugi þegar slysið varð.
Flugvélin fór í tvennt við áreksturinn og endaði brakið í Potomac-ánni sem er ísköld á þessum árstíma. Vélin var að koma frá Wichita í Kansas.
WUSA9 ræddi við Hamaad þar sem hann sat á flugvellinum og beið frétta af leitaraðgerðum.
„Ég vona að það sé einhver að draga hana upp úr ánni í þessum töluðu orðum. Það er það eina sem ég get vonað, ég bið til Guðs,“ sagði hann en eiginkona hans er aðeins 26 ára gömul og var í vinnuferð í Wichita.
Raza segir að eiginkona hans hafi sent honum skilaboð þess efnis að vélin væri að lenda eftir 20 mínútur og sýndi hann fréttamanninum skilaboðin. Það voru síðustu skilaboðin sem hann fékk frá henni. Hann sagðist svo hafa sent henni skilaboð en þau ekki skilað sér og þá hafi hann farið að gruna að eitthvað alvarlegt hefði gerst.
CNN greinir frá því að enginn hafi fundist á lífi eftir slysið og CBS sagði í morgunsárið að átján lík hefðu fundist. Er fjölmennt lið kafara á vettvangi að leita í ánni.
