Þingflokkur Samfylkingarinnar hefur gert kröfu um að fá stærsta þingflokksherbergið í Alþingishúsinu til afnota þegar þing kemur saman innan skamms. Sjálfstæðisflokkurinn hefur aftur á móti haft umrætt herbergi frá árinu 1941 og vill alls ekki gefa það eftir til Samfylkingarinnar.

Fjallað er um þetta í Morgunblaðinu í dag.

Eins og kunnugt er varð Samfylkingin stærsti flokkurinn eftir kosningarnar í lok nóvember og fékk 15 þingmenn kjörna og bætti við sig níu þingmönnum á meðan Sjálfstæðisflokkurinn fékk 14 þingmenn og missti tvo þingmenn.

Hildur Sverrisdóttir, þingflokksformaður Sjálfstæðisflokksins, staðfestir í samtali við Morgunblaðið að Ragna Árnadóttir, skrifstofustjóri Alþingis, hefði sent henni bréf í byrjun mánaðar um erindi Samfylkingarinnar – að taka yfir herbergi Sjálfstæðisflokksins.

Hildur segir við blaðið að hún hafi sent Rögnu athugasemdir og bent á að krafa Samfylkingar væri ekki í samræmi við reglur forsætisnefndar um úthlutun þingflokksherbergja. Þar sé kveðið á um að flokkar almennt haldi herbergjum sínum nema annað kalli á breytingar, stærð þingflokka til dæmis.

Bendir Hildur á að 19 manna þingflokkur hafi verið í næsta herbergi án þrengsla eða vandkvæða. Ekki virðist liggja fyrir hvort kröfum Samfylkingarinnar verði mætt en það kemur væntanlega í ljós fljótlega.