Í tilkynningu frá Icelandair kemur fram að flug til Evrópu í fyrramálið sé á áætlun en raskanir séu á flugi til Íslands frá Evrópu eftir hádegið á morgun og einnig flugi sem er á áætlun til Norður-Ameríku og Evrópu síðdegis.
„Af þessum völdum þarf einnig að aflýsa flestum ferðum bæði frá Norður-Ameríku og til Evrópu snemma á laugardagsmorgun, 1. febrúar. Innanlandsflug er enn sem komið er á áætlun en mögulegt er að komi til raskana á því,“ segir í tilkynningu félagsins.
Þá kemur fram að í heild verði 30 ferðum til landsins aflýst og 30 frá landinu.
„Icelandair fylgist vel með veðurspám næstu daga og verður félagið í sambandi við farþega ef breytingar verða á flugi.“
Í tilkynningunni kemur fram að farþegar sem áttu bókað með flugi sem nú hefur verið aflýst verði endurbókaðir og munu fá senda nýja ferðaáætlun. Vegna umfangs röskunarinnar má búast við að endurbókunarferlið taki lengri tíma en venjulega.
„Farþegum er þökkuð þolinmæðin og bent á að fylgjast vel með þeim skilaboðum sem félagið sendir auk þess sem hægt er að fylgjast með á vef félagsins undir bókunin mín og í Icelandair appinu. Ekki er þörf á að hafa samband við Icelandair nema ný ferðaáætlun falli ekki að ferðalaginu.“
