Rithöfundurinn Illugi Jökulsson gefur lítið fyrir skýringar stuðningsmanna auðkýfingsins Elon Musk á handahreyfingum hans á samkomu repúblikana í gær. Ríkasti maður heims hafi augljóslega verið að heilsa að nasistasið. Þetta kemur fram í pistli hans sem birtist hjá Heimildinni í morgun.

Illugi segir að eðli kveðjunnar fari ekki á milli mála en hann kallar hana „viðurstyggilega nastistakveðju“ sem þar að auki var látin flakka úr ræðustól sem var rækilega merktur embætti forseta Bandaríkjanna.

„Hin fasíska tilhneiging margra áhangenda Trumps hefur aldrei fyrr birst á jafn augljósan hátt — enda lét Musk sér ekki nægja að heilsa að nasistasið einu sinni, heldur gerði það tvisvar.“

Illugi rekur að sumir stuðningsmenn Trump hafi reynt að afsaka kveðjuna með því að vísa til þess að hún komi nú ekki upphaflega frá fasistum eða nasistum heldur sé um að ræða forna rómverska kveðju sem ítalskir fasistar hafi svo stolið löngu síðar.

„Þetta er bull. Engar heimildir, nákvæmlega engar, eru um að kveðja í þessa áttina hafi verið notuð af Rómverjum hinum fornu.“

Rithöfundurinn rekur að um sé að ræða sögusagnir sem rekja megi til málverks frá árinu 1784 eftir franska málarann David.  Málarinn var að túlka frásögn úr riti rómverska söguritarans Liviusar um þrjá bræður sem voru að vinna eið um að þeir væru tilbúnir að fórna lífinu fyrir borg sína.

„Það sem skiptir máli hér er hins vegar að sá sperrti hægri armur og hönd er snýr niður með útrétta fingur sem bræðurnir sverja með eiðinn er algjörlega uppfinning Davids. Ég ítreka að engar heimildir eru í rómverskum ritum um slíka kveðju.“

Illugi segir að því sé það úr lausu lofti gripið að hér sé á ferðinni einhver ævaforn rómversk kveðja.

„En sem sé, vilji menn afsaka framferði Musks með Hitlers-kveðjunni þannig að þar hafi verið um að ræða ævaforna rómverska kveðju, þá er það úr lausu lofti gripið.

Þetta var Hitlers-kveðja og ekkert annað.

Og hefur ekki þótt brúkleg í siðuðu samfélagi í 80 ár — fyrr en þá núna.“