Áslaug Arna Sigurbjörnsdóttir, oddviti Sjálfstæðisflokksins í Reykjavík suður, segist hafa fengið ótal áskoranir um að gefa kost á sér til formennsku í Sjálfstæðisflokknum.

Landsfundur flokksins fer fram í lok febrúar þar sem nýr formaður verður kjörinn í stað Bjarna Benediktssonar sem ætlar að láta gott heita eftir 16 ára formennsku.

Morgunblaðið í dag hefur eftir Áslaugu að hún hugleiði framboð, margir hafi skorað á hana og hún taki þær áskoranir alvarlega. Hún ætlar þó ekki að flýta sér.

„Mér ligg­ur ekki á og finnst dýr­mætt að eiga fleiri hrein­skil­in og inni­halds­rík sam­töl við flokks­menn áður en ég ákveð mig. Ég vil gefa mér nokkra daga í það,“ seg­ir hún við Morgunblaðið en eins og komið hefur fram hafa ýmsir verið orðaðir við framboð til formennsku.

Þar á meðal eru þingmennirnir Guðlaugur Þór Þórðarson, Guðrún Hafsteinsdóttir og Þórdís Kolbrún Reykfjörð Gylfadóttir.

Í frétt Morgunblaðsins er bent á að ekki hafi borið mikið á opinberum áskorunum, en þess er þó getið að Heiðrún Lind Marteinsdóttir og Heiðar Guðjónsson hafi verið á einu máli um erindi Áslaugar í formannsembættið í þætti Gísla Freys Valdórssonar, Þjóðmálum, á dögunum. Segir í frétt Morgunblaðsins að bæði Heiðrún og Heiðar megi teljast „atkvæðafólk” í flokknum.