Flóð auglýsinga frá veðmálasíðu sem kallast 20Bet hefur varla farið fram hjá íslenskum notendum myndbandsstreymissíðunnar Youtube. Auglýsingarnar eru langar, sjónrænt áreiti mikið og bjagaður íslenskur texti lesinn upp af gervigreindarrödd. Eru margir netverjar byrjaðir að kalla eftir því að auglýsingarnar verði tilkynntar, enda sé starfsemin ólögleg á Íslandi.
„Þessar auglýsingar frá 20Bet, eins og margir hér vita, eru bæði pirrandi og ólöglegar. Ég er að vonast til þess að ef þeim er drekkt í kvörtunum hætti YouTube loksins að birta þær,“ segir netverji á samfélagsmiðlinum Reddit, önugur út í auglýsingar veðmálasíðunnar. „Ég er að vonast til þess að ef þeim er drekkt í kvörtunum hætti YouTube loksins að birta þær.“
Bendir hann fólki á að fara inn á auglýsingarnar, velja „tilkynna“, síðan „lagalegt málefni“, svo „annað lagalegt málefni“ og vísa þar í íslensk hegningarlög. Það er 183. greinina þar sem segir að sá sem geri sér fjárhættuspil eða veðmál að atvinnu eða það að koma öðrum til þátttöku í þeim skuli sæta sektum eða fangelsi allt að einu ári.
„Gakktu til liðs við okkur í dag og fáðu allt að 220 uró og 170 frísnúnings“, „Þetta er okkar epíski móttökubónus“, „Biddu um velkomandabónusinn“, „Lukkuhrinan þín hefst hér“ og „Finndu okkur á netinu“ eru á meðal þeirra frasa sem dynja á notendum Youtube undir áreiti tónlistar, hljóða og skærra lita. Auk þess að ráðast á öll skilningarvitin bjaga auglýsingarnar tungumálið á hálf fyndinn hátt. En eftir tíunda skiptið dofnar húmorinn, hvað þá hundraðasta.
„Ég er orðinn svo þreyttur á þessum auglýsingum að ég er við það að hætta alveg að horfa á YouTube,“ segir einn netverji í athugasemdum.
Færslan hefur fengið mikil viðbrögð og hefur fólk mismikla trú á að það virki að tilkynna auglýsingarnar. Einn nefnir að Youtube sé sama hvað það sé að auglýsa svo lengi sem peningarnir streymi inn. Annar nefnir að veðmálafyrirtækið komist fram hjá bönnum með því að vera með margar útgáfur af fyrirtækinu. Flestir virðast sammála um það að auglýsingarnar séu til óþurftar.
Einn nefnir hins vegar að ef nógu margir tilkynni þá sé hægt að losna við þær. Það er að þær verði „shitlistaðar“. Það hafi hann séð gerast í nokkur skipti. Hann segir að það sé vandamál hversu margir krakkar verði háðir spilavítisleikjum og eyði í þetta háum fjárhæðum, fjárhæðum sem streymi úr landi.
„Auðvitað ættum við að hafa líka samband við lögguna eða dómsmálaráðuneytið út af þessu og láta þau láta yt [Youtube] shitlista þessar auglýsingar, en þangað til þá verðum við að taka þessar 1-2 mínútur í það,“ segir hann. Að minnsta kosti þurfa 20Bet þá að hafa fyrir því að láta gera nýjar auglýsingar.
Annar nefnir að það sé þjóðhagslegur ávinningur í því að íslenska ríkið tæki almennilega á þessu, gera málið að milliríkjadeilu, snúa upp á hendur auglýsandans um að virða íslenska auglýsingalöggjöf þegar komi að auglýsingum sem beint sé að íslenskum þegnum.
„Ég hugsa að eina leiðin til að Youtube vilji gera nokkuð í þessu sé ef þau standa frammi fyrir einhvers konar hegningu, hvort sem það er bad press [neikvæð umfjöllun] á öðrum samfélagsmiðlun eða fréttamiðlum, þrýstingur frá íslenskum stjórnvöldum (ef það svo sem breytir einhverju) eða jafnvel lögsókn. Ef þau eru að rannsaka sig sjálf þá finna þau auðvitað ekkert að,“ segir enn annar.
