Skúli tók félagið til bæna á dögunum fyrir að eyða formúu af peningum í dýrasta auglýsingapláss landsins rétt áður en áramótaskaupið var sýnt á gamlárskvöld.
Skúli gagnrýndi þetta í pistli á Vísi og benti á að flest fyrirtæki á einkamarkaði hefðu þurft að huga verulega að kostnaði í því efnahagsumhverfi sem ríkt hefur hér á landi síðustu misseri.
„Mig rak því í rogastans þegar ég sá að Isavia hafði látið framleiða eina lengstu auglýsingu sem ég hef nokkurn tímann séð í sjónvarpi á Íslandi og lét birta hana í dýrasta auglýsingatíma sem til er í íslenskum fjölmiðlum, fyrir áramótaskaup RÚV á liðnu gamlárskvöldi,“ sagði Skúli meðal annars og giskaði á að auglýsingin, bæði framleiðsla og birting, hefði kostað um sex milljónir króna.
Isavia svaraði þessu með grein á vef sínum þar sem bent var á að fyrirtæki í markaðsráði Keflavíkurflugvallar hafi staðið saman að auglýsingunni og fjármögnun hennar. Var þessu líkt við fyrirkomulag sem tíðkast til dæmis í verslunarmiðstöðvum á borð við Smáralind og Kringluna.
Í frétt Morgunblaðsins í dag er bent á að Isavia virðist „ekki hafa verið fært“ um að svara án utanaðkomandi aðstoðar því blaðið kveðst hafa tölvupósta undir höndum þar sem Berglind Arnardóttir, vörumerkjastjóri Isavia, segir til dæmis:
„Við höfum ráðfært okkur við fjölmiðlaráðgjafana okkar hjá Aton og niðurstaðan er að svara þessari ábendingu Skúla. Aton hefur aðstoðað okkur við að móta svar og munum við gefa það út á vefnum okkar eftir skamma stund,“ segir í póstinum sem Morgunblaðið vitnar til.
Skúli birti svo aðra grein 6. janúar síðastliðinn þar sem hann gerði lítið úr svörum Isavia. Hvatti hann félagið meðal annars til að upplýsa um kostnaðinn. Morgunblaðið segir að Berglind hafi í kjölfarið sent póst sem ekki megi skilja öðruvísi en svo að Isavia ætli að sjá hvort félagið komist ekki upp með að svara engu um síðari greinina og láta málið sofna.
