Það vakti mikla athygli þegar norðurkóreskir hermenn voru sendir til að berjast með Rússum í Úkraínu. Ástæðan fyrir komu þeirra er að mannfall Rússa er mjög mikið og þeir eiga í erfiðleikum með að fylla í skörðin. Nú er Vladímír Pútín farinn að sækja sér hermenn í aðra heimsálfu.

Dagbladet segir að á Telegram sé sérstök rás þar sem rússnesk kona vinnur að því að fá arabískumælandi menn til að ganga til liðs við rússneska herinn. Hún lofar þeim rússneskum ríkisborgararétti, milljónum rúbla og ýmsum hlunnindum.

Þetta virðist virka, því margir ungir menn hafa gengið til liðs við rússneska herinn og margir þeirra hafa fallið á vígvellinum í Úkraínu að sögn Dagbladet.

Konan lofsamar hermennina í færslum sínum á Telegram og segir þá meðal annars vera „hetjur“.

„Mohammed, okkar kæri vinur. Ég er stolt af þér. Þú ert sannur Rússi,“ segir hún til dæmis í einni færslu þar sem mynd af svörtum manni fylgir með. Hann er með stóra vélbyssu og skotfærabelti.