Samúðarkveðjum vegna andláts Frans páfa sem birtar voru á samfélagsmiðlum ísraelsku ríkisstjórnarinnar var eytt nokkrum klukkutímum eftir að þær voru birtar. Öllum ísraelskum ríkisstofnunum hefur verið skipað að eyða öllum sambærilegum kveðjum vegna andláts páfa.

Breska blaðið Independent greinir frá þessu.

„Hvíl í friði Frans páfi. Megi minning hans vera blessun,“ var birt á X reikningi ísraelsku ríkisstjórnarinnar á mánudag, dánardag hans. Meðfylgjandi var ljósmynd af páfanum sáluga í heimsókn við Vesturvegginn í Jersúsalem.

Nokkrum tímum síðar var færslunni eytt og ekki birt ný í staðinn. Var öllum opinberum ísraelskum stofnunum og sendiráðum fyrirskipað að birta ekki samúðarkveðjur eða minningar um Frans páfa á samfélagsmiðlum.

Samkvæmt dagblaðinu Jerusalem Post kom skipunin frá utanríkisráðuneytinu. Ástæðan er sögð vera sú að Frans hafi talað gegn Ísrael og að upphaflega birtingin hafi verið mistök. Frans páfi sýndi íbúum á Gaza samstöðu og talaði fyrir friði á svæðinu allar götur síðan átökin brutust út í október árið 2023.

Í lokapáskaávarpi sínu kallaði Frans eftir vopnahléi á Gaza og sagði að ástandið þar væri hræðilegt og fyrirlitlegt.

„Ég skammast mín fyrir að ísraelska ríkisstjórnin og Knesset [ísraelska þingið] hafi ekki birt opinberar samúðarkveðjur,“ sagði Gilad Kariv, þingmaður í stjórnarandstöðu. „Ég er hér að senda samúðarkveðjur af hálfu mikils meirihluta ísraelskra borgara.“