Auglýstur hefur verið fyrirlestur með manni að nafni Gad Saad í Hörpu í júní. Saad er afar umdeildur fræðimaður og er einn af helstu áhrifavöldum Elon Musk.
Saad er kanadískur þróunarsálfræðingur, líbanskur gyðingur að uppruna, með doktorsgráðu frá Cornell háskóla. Hann starfar við Concordia háskóla í Montreal. Í auglýsingu viðburðarins segir að hann hafi á ferli sínum rannsakað þróunarlegar skýringar mannlegrar hegðunar, svo sem neytendahegðunar.
„Í rannsóknum sínum fer dr. Saad ítarlega ofan í saumana á þeim líffræðilegu þáttum sem móta mannlegar athafnir og samfélagslega strauma. Í bókinni The Parasitic Mind og fjölda ritrýndra greina hefur hann greint flókin viðfangsefni af skarpskyggni með vel rökstuddri sýn sem byggir á sönnunargögnum,“ segir í auglýsingunni.
Kemur fram að áhrif Saad á alþjóðavettvangi hafi farið vaxandi. Hann hafi orðið áberandi persóna með þátttöku í þáttum og hlaðvörpum, svo sem með Joe Rogan og Elon Musk. Þá heldur hann út sínu eigin hlaðvarpi, The Saad Truth, þar sem hann fjallar um þjóðfélagsleg málefni.
Sú hugmynd sem Saad er hvað þekktastur fyrir, og menn eins og Elon Musk hafa tekið upp, er að samúð með öðru fólki sé að drepa Vesturlönd. Svokölluð „sjálfseyðingar samúð.“ Það er að samfélagið hrörni og deyi þegar það skipti meira máli að sýna samúð og umburðarlyndi en að hugsa um eigin hagsmuni og leiðir til að lifa af.
Þessar kenningar eru byrjaðar að hafa bein áhrif í Bandaríkjunum í gegnum menn eins og Elon Musk sem hefur eyra Donald Trump forseta. Til dæmis með niðurlagningar þróunaraðstoðar Bandaríkjanna.
En Saad hefur einnig komist í fréttir fyrir ýmis vafasöm ummæli. Meðal annars fyrir að hafa kallað Kamölu Harris, fyrrverandi varaforseta Bandaríkjanna, níðing og heilalausan kommúnista. Hann hefur einn haft umdeildar skoðanir á til dæmis konum, transfólki og múslimum.
Koma hans hefur ekki farið fram hjá Íslendingum. Meðal annars þeim sem hafa talað fyrir hagsmunum Palestínumanna.
„Ætla rétt að vona að þetta floppi. Gad Saad er einn versti zíonistinn á netinu,“ segir ein kona á samfélagsmiðlum í umræðum um viðburðinn.
„Þetta er síonisti og hálfviti, en auk þess rasisti gagnvart svörtu fólki, innflytjendum almennt og hatar konur,“ segir upphafsmaður umræðunnar. „Sem sagt maður sem margir vilja hlusta á hér, sama fólk og fór á Jordan Peterson. Nema þessi er reyndar helmingi verri en JP og er þá mikið sagt.“
Það virðist vera rétt hjá honum því í umræðum á síðu viðburðar Jordan Peterson á Íslandi er áhugafólk hvatt til að mæta einnig á fyrirlestur Gad Saad.
