Túnið við húsið Höfða við Borgartún í Reykjavík er enn þá illa skemmt eftir stórundarlegt slys sem varð þar í febrúar. Upplýsingafulltrúi Reykjavíkur segir ekki hægt að fara í viðgerðir strax.
Þann 20. febrúar voru sagðar fréttir af því að stórri rútu hefði verið keyrt inn á túnið við Höfða. Eins og sást á ljósmyndum sem fylgdu spændist túnið upp og á endanum þurfti að draga rútuna burt.
Ásmundur Halldór Einarsson, eigandi ferðaþjónustufyrirtækisins ME Travel sem á rútuna, sagði um mannleg mistök að ræða. Bílstjórinn hafi verið óreyndur og talið sig geta snúið rútunni við á túninu. Þar sökk hins vegar rútan ofan í svörðinn.
Tæpum tveimur mánuðum seinna er allt óbreytt á túninu og mörgum finnst hvumleitt að sjá svæðið svona illa farið.
Inga Rún Sigurðardóttir, sérfræðingur í upplýsingamálum og miðlun hjá Reykjavíkurborg, segir að það sé ekki hægt að fara í viðgerðir á svæðinu fyrr en nær dregur sumri. Svæðið verði lagað en nákvæm tímasetning liggur ekki fyrir.
Aðspurð um kostnað segir hún hann heldur ekki liggja fyrir. Ekki sé því enn þá hægt að rukka fyrirtækið fyrir viðgerðirnar.
