Kennarar í kvikmyndagerð við Listaháskóla Íslands lýsa í aðsendri grein á Vísi yfir mikilli ónægju með gagnrýni eins helsta kvikmyndagerðarmanns Íslandssögunnar, Friðriks Þórs Friðrikssonar, á námið. Segja kennararnir að Friðrik Þór hafi gengið of langt í gagnrýni sinni.
Það eru þau Steven Meyers, Guðrún Elsa Bragadóttir, Ása Helga Hjörleifsdóttir, Brúsi Ólason, Erlendur Sveinsson og Heather Millard sem skrifuð eru fyrir greininni.
Þau segja gagnrýni Friðriks Þórs hafa komið fram í viðtali við hann á Samstöðinni og þegar talið hafi borist að náminu sem þeirra hlutverk er að sjá um hafi hann tekið of djúpt í árinni:
„Þar talar þú m.a. um að það hafi verið „mistök“ og „hreint skemmdarverk“ að stofna deildina okkar, og gengur svo langt að kalla námið „bara eitthvað rusl.“ Undir venjulegum kringumstæðum myndum við láta slíkar ákúrur sem vind um eyru þjóta, en í ljósi þess hversu skakka mynd þú dregur upp, virtur kvikmyndaleikstjóri sem ætla má að nemendur okkar líti upp til, þykir okkur ástæða til þess að svara og leiðrétta nokkrar af þeim rangfærslum sem þú setur fram um deildina okkar og stöðu íslenskrar kvikmyndamenntunar.“
Segja þau Friðrik Þór vita vel að deildin sem þau starfa við hafi verið stofnuð eftir langa baráttu fagfólks úr íslenska kvikmyndasamfélaginu fyrir því að boðið yrði upp á háskólanám í kvikmyndagerð hér á landi, sem myndi uppfylla ströngustu gæðakröfur.
Segja þau Friðrik Þór ranglega halda því fram að Kvikmyndaskóla Íslands, sem hann hefur starfað sjálfur við, hafi einungis boðist aðild að alþjóðasamtökum kvikmyndaskóla (CILECT) vegna mikilla gæða námsins. Hið rétta sé að öllum kvikmyndaskólum standi til boða aðild þegar þeir hafi starfað í fimm ár eða lengur en kvikmyndalistadeild Listaháskólans muni bjóðast slík aðild þegar hún uppfylli þessi skilyrði en deildin tók til starfa haustið 2022.
Kennararnir segja deildina eiga í víðtæku samstarfi við kvikmyndaskóla á Norðurlöndunum og nemendum standi til boða starfsnám og styttri námsferðir erlendis. Þau telja Friðrik Þór, miðað við orð hans í viðtalinu, búa yfir lítilli þekkingu á námi í kvikmyndagerð við Listaháskólann. Segja kennarnir skipulags námsins byggja á mikilli rannsóknar- og þróunarvinnu auk reynslu Íslendinga og Íslandsvina sem menntað hafi sig í kvikmyndagerð.
Segja kennarnir námið byggja á bæði verklegum og fræðilegum grunni. Nemendur hafi nú þegar vakið athygli fyrir verk sín. Þau leggja síðan áherslu á að í fyrsta sinn verði nemendur útskrifaðir úr náminu í vor og verði þá þeir fyrstu til að ljúka háskólanámi í kvikmyndagerð á Íslandi.
Beinir kennarahópurinn að lokum þeim orðum til Friðriks Þórs að í raun ætti hann að vera ánægður en ekki kvarta vegna þessara tímamóta:
„Þessi áfangi er afrakstur áratugalangrar, þrotlausrar vinnu margra kollega þinna og vina. Þetta er mikilvægt tilefni sem kvikmyndagerðarsamfélagið ætti að fagna í sameiningu. Í þeim anda viljum við bjóða þér að halda með okkur upp á árangurinn sem hefur náðst.“
Grein kennara í kvikmyndagerð við Listaháskóla Íslands er hægt að nálgast í heild sinni hér.
