Konu sem starfaði á þjónustu- og nýsköpunarsviði Reykjavíkurborgar var sagt upp störfum. Ástæður uppsagnarinnar voru sagðar lægri fjárveiting borgarinnar til sviðsins og minnkandi vægi þeirra verkefna sem konan sinnti.
Konan taldi uppsögnina vera ólöglega þar sem hún væri trúnaðarmaður hjá stéttarfélagi sínu og vinnufélaga hennar. Borgin hafnaði því að uppsögnin væri ólögmæt, hún væri ótengd stöðu konunar sem trúnaðarmanns og væri málefnaleg.
Konan krafðist rúmlega 18,5 milljóna króna í bætur, eða andvirði 18 mánaðarlauna.
Héraðsdómur Reykjavíkur féllst á að uppsögnin hefði verið ólögmæt á grundvelli stöðu konunnar sem trúnaðarmaður stéttarfélagsins. Hún hefði hins vegar borið takmarkaðan skaða af uppsögninni og fengið fljótt aðra vinnu, enda aðeins 45 ára gömul og búsett á stóru atvinnusvæði. Hún hafi hins vegar þurft að lifa á atvinnuleysisbótum í tvo mánuði í kjölfar starfsmissisins, eða eftir að þriggja mánaða launuðu uppsagnartímabili lauk.
Taldi dómurinn hæfilegar bætur til konunnar vera 1 milljón króna.
Dóminn má lesa hér.