Ný gossprunga opnaðist sunnan við varnargarðinn fyrir ofan Grindavík um klukkan 10:40. Benedikt Ófeigsson, sviðsstjóri aflögunarmælinga hjá Veðurstofu Íslands, var í beinni útsendingu á Rás 2 þegar sprungan opnaðist.

Á vefmyndavélum sést að sprungan opnaðist aðeins sunnan við gróðurhús ORF sem er þegar ónýtt. Frá gróðurhúsinu að byggð eru 700 til 800 metrar.

Benedikt sagði í viðtalinu, áður en sprungan opnaðist, að það væri möguleiki eins og gerðist í janúar í fyrra að ný sprunga gæti opnast. „Þetta er minna í sniðum en við getum ekki útilokað það,“ sagði hann áður en sprungan opnaðist.

Benedikt sagði augljóst að gosið nú væri mun minna í sniðum en síðustu gos.

Hægt er að fylgjast með stöðu mála á vefmyndavélinni hér að neðan.