Einar Á.E. Sæmundsson, þjóðgarðsvörður á Þingvöllum, segir að undanfarin ár hafi farið að bera meira á þjófnaði á Þingvöllum þar sem vasaþjófar eru að verki.

Fjallað er um þetta mál í Morgunblaðinu í dag og segir Einar í samtali við blaðið að erlendir þjófar hafi gert sig mjög gildandi á svæðinu í vetur. Kemur fram í frétt Morgunblaðsins að asískir ferðamenn séu algeng fórnarlömb og að þjófagengi frá Austur-Evrópu séu yfirleitt að verki.

Einar segir til dæmis að vasaþjófar hafi verið gripnir glóðvolgir fyrir rúmum mánuði þar sem þeir voru með krumlurnar ofan í tösku hjá ferðamanni.

„Hann sner­ist til varn­ar og það varð smá uppá­koma á Hak­inu vegna þessa. Þjóf­arn­ir komust und­an, en ég gat skoðað mynd­efni og fékk lög­regl­an þær upp­lýs­ing­ar. Þegar við skoðuðum efnið bet­ur sáum við að sami bíll­inn hafði komið hér fjóra eða fimm daga í röð og alltaf á sama tíma,“ seg­ir Ein­ar við Morgunblaðið og bætir við:

„Það var eins og hann væri að stimpla sig inn til vinnu.“

Einar hvetur leiðsögumenn og bílstjóra sem eru í tengslum við ferðahópa að láta þá vita af stöðu mála.