Í þættinum var farið yfir yfirvofandi breytingar á fiskveiðistjórnunarkerfinu og gætu veiðigjöldin tvöfaldast ef breytingarnar ná fram að ganga.
Sitt sýnist hverjum um þetta og hafa til dæmis Samtök fyrirtækja í sjávarútvegi sagt að frumvarpið komi til með að tvöfalda gjaldtökuna á sjávarútveginn og valda auknum rekstrarerfiðleikum. Ríkisstjórnin hefur hins vegar talað um leiðréttingu og segir að greinin ráði vel við breytingarnar.
Í þættinum var farið yfir þessi mál og gagnrýndi Sigurður Ingi ríkisstjórnina, sagði hana í „panikk-ástandi“ á meðan Hanna Katrín varði yfirvofandi breytingar með kjafti og klóm. Hlaut hún mikið lof fyrir frammistöðu sína ef marka má umræðuna á samfélagsmiðlum.
„Frammistaða Hönnu Katrínar Friðriksson í Kastljósi kvöldsins var þvílík að annað eins hefur ekki sést í háa herrans tíð. Loksins er kominn fram stjórnmálamaður með bein í nefinu gagnvart stórútgerðinni. Rökföst, réttsýn og skelegg. Sigurður Ingi átti ekkert í þennan nagla – enda hafði hún sterkari málstað,” sagði til dæmis Ólína Þorvarðardóttir, prófessor og deildarforseti Félagsvísindadeildar Háskólans á Bifröst.
Margir tóku undir orð hennar í athugasemdum. „Hún var geggjuð,“ sagði Helga Vala Helgadóttir, fyrrum þingkona Samfylkingar. „Sammála,“ sagði Kristján Berg Ásgeirsson, kenndur við Fiskikónginn, undir athugasemd Helgu Völu. „Hún var hörku flott,“ sagði Björgvin G. Sigurðsson, fyrrverandi ráðherra. „Hvílík drottning,“ sagði leikarinn Valdimar Örn Flygenring.
Illugi Jökulsson fjölmiðlamaður lét sitt ekki eftir liggja. „Ríkisstjórnin lofar góðu. Frábær frammistaða Hönnu Katrínar Friðriksson gegn allt að því aumkunarverðum málsvara auðugustu manna landsins,” sagði hann.
Lýður Árnason, læknir og kvikmyndagerðarmaður, hrósaði henni einnig.
„Hanna Katrín Friðriksson, atvinnumálaráðherra, átti sína eldskírn í Kastljósi kvöldsins og stóð sig feikivel. Umræðan var hærri veiðigjöld á sjávarútveginn. HKF rökstuddi mál sitt vel og klári ríkisstjórnin málið mun þjóðin að óbreyttu fá meiri arð af sinni auðlind,“ sagði hann og klykkti út með þessum orðum:
„Ég segi bara: Áfram ríkisstjórn og látið ekki væl kvótagreifa sem nánast eru búnir að kaupa upp allt Ísland á ykkur fá.“
