Kaþólskir pílgrímar flykkjast nú til bæjarins Assisi í Ítalíu til að vitja þar jarðneskra leifa Carlos Acutis, bresk skóladrengs sem lést af völdum hvítblæði árið 2006, þá aðeins 15 ára gamall. Acutis, sem hefur verið kallaður „áhrifavaldur guðs“, var blessaður af Frans páfa árið 2020 en ráðgert er að hann verði fyrsti 21. aldar dýrlingur kaþólsku kirkjunnar. Í kapellu í Assisi má berja smurt lík hans augum og þar er ekki þverfótað af hverskonar varningi sem seldur er kirkjunni til dýrðar.

Acutis fæddist í London árið 1991 en fluttist ungur að aldri til Mílanó. Foreldrar hans voru ekki mjög trúræknir en Acutis fann köllun sína hjá kirkjunni og vildi dreifa út fagnaðarerindið, til að mynda með hæfileikum sínum í forritun og heimasíðugerð. Þá er hann sagður hafa hjálpað heimilislausu fólki sem og krökkum sem lagðir voru í einelti.

Fljótlega eftir andlátið fór að bera á röddum sem vildu að Acutis yrði dýrlingur. Árið 2019 á svo fyrsta kraftaverkið tengst Acutis að hafa gerst. Brasilískur drengur sem aðeins gat borðað fljótandi fæði vegna veikinda var sagður hafa náð sér eftir að hafa beðið til Acutis. Kaþólska kirkjan rannsakaði fullyrðinguna og staðfesti að lokum kraftaverkið í febrúar 2020 og síðar sama ár var Carlo Acutis blessaður af Frans Páfa, sem færði hann skrefi nær dýrlingatölunni.

Annað kraftaverkið tengt Acutis á síðan að hafa átt sér stað í Kosta Ríka árið 2022. Ung stúlka slasaði sig á hjóli og varð fyrir alvarlegum heilablæðingum. Móðir hennar bað til Acutis og stuttu síðar batnaði stúlkunni. Frans páfi staðfesti kraftaverkið þann 23. maí í fyrra og í kjölfarið hófst undirbúningurinn að því að Carlos Acutis yrði tekinn í dýrlingatölu. Athöfnin mun fara fram þann 27. apríl 2025.