Rósa Guðbjartsdóttir þingmaður Sjálfstæðisflokksins og bæjarfulltrúi flokksins í Hafnarfirði og formaður bæjarráðs hefur hlotið nokkra gagnrýni fyrir að víkja ekki úr bæjarstjórninni og úr stjórn Sambands íslenskra sveitarfélaga. Hefur hún einnig verið gagnrýnd fyrir að gefa óskýr svör um hvort hún ætli að gegna þessum stöðum samhliða þingmennskunni en pólitískur andstæðingur hennar í Hafnarfirði segir að Rósa virðist vera ráðavillt og það sé enginn til staðar til að taka við forystuhlutverki hennar meðal Sjálfstæðismanna í bæjarstjórninni í Hafnarfirði.
Guðmundur Ari Sigurjónsson þingflokksformaður Samfylkingarinnar gagnrýndi harðlega fyrr í dag þaulsetu Rósu í bæjarstjórn og stjórn sambandsins en sjálfur sagði hann sig úr stjórninni og bæjarstjórn Seltjarnarness þegar hann eins og Rósa var kjörinn á þing í alþingiskosningunum í nóvember 2024. Rósa tjáði RÚV í morgun að hún ætlaði sér ekki að hætta í stjórn sambandsins fyrir landsþing þess sem hefst á fimmtudaginn en að hún reikni með að segja sig frá störfum sínum sem bæjarfulltrúi í Hafnarfirði fyrir lok kjörtímabilsins, vorið 2026, en gaf ekki upp nánari tímasetningar.
Nú hefur bæjarfulltrúi Samfylkingarinnar í Hafnarfirði, Árni Rúnar Þorvaldsson, bæst í hóp gagnrýnenda Rósu í aðsendri grein á Vísi.
Hann telur alveg ljóst að svör Rósu um hvað hún ætli að gera hafi ekki verið sérstaklega skýr:
„Hún verður ekki sökuð um að tala skýrt en samkvæmt fréttum í dag ætlar hún að sitja áfram í stjórn sambandsins en gæti e.t.v. hugsanlega hætt þar og í bæjarstjórn á næstunni. Gæti hætt en er ekki viss, þarf að klára einhver verkefni í bæjarstjórn en tilgreinir ekki hver þau eru og treystir því væntanlega ekki nýjum bæjarstjóra Framsóknarflokksins til þess að stýra þeim í örugga höfn eða þá félögum sínum í Sjálfstæðisflokknum. Óskýrara verður orðasalatið varla. Kannski er erfitt að ætlast til skýrleika þegar sinna þarf jafn mörgum og fjölbreyttum ábyrgðarstörfum og mögulega aldrei hægt að vera alveg viss um í krafti hvaða embættis er talað.“
Sakar hann Rósu og aðra Sjálfstæðismenn í stjórn Sambands íslenskra sveitarfélaga sem og fulltrúa Framsóknarmanna um að hafa viljandi þvælst fyrir því að gerður yrði kjarasamningur við grunnskólakennara. Þetta hafi verið gert til að koma höggi á formann stjórnarinnar Heiðu Björg Hilmisdóttur sem hefur tilkynnt að hún muni víkja úr stjórninni til að einbeita sér að störfum sínum sem borgarstjóri í Reykjavík.
Árni telur blasa við að það sé vandræðagangur Sjálfstæðisflokksins í Hafnarfirði og skortur á arftaka Rósu í forystusætinu sem sé helsta ástæða tregðu hennar til að hætta í bæjarstjórn Hafnarfjarðar og stjórn Sambands íslenskra sveitarfélaga og hún sé þar með eini sveitarstjórnarfulltrúinn sem náði kjöri í alþingiskosningunum sem hafi ekki beðist lausnar. Launagreiðslur hafi þó líklega eitthvað með þetta að gera:
„Krísa flokksins í Hafnarfirði lítur út fyrir að vera alvarleg og djúpstæð því viðtöl við þingkonuna, bæjarfulltrúann, formann bæjarráðs og stjórnarkonuna í Sambandi íslenskra sveitarfélaga benda til þess að hún viti varla hvort hún er að koma eða fara. Það kann aldrei góðri lukku að stýra og eflaust trufla líka háar launagreiðslur frá Hafnarfirði og Sambandi íslenskra sveitarfélaga ofan á þingfararkaupið dómgreindina.“
Grein Árna er hægt að nálgast í heild sinni hér.
