Karlmaður hefur verið sýknaður af því að hafa skallað konu í andlitið á tónlistarhátíðinni Kótelettunni á Selfossi. Konan var blóðug og nefbrotin.
Dómur í málinu féll í Héraðsdómi Suðurlands þann 10. mars síðastliðinn en var birtur í dag. Atvikið átti sér stað fyrir nærri þremur árum síðan, það er aðfaranótt sunnudagsins 10. júlí árið 2022 á tónleikasvæðinu Kótelettunnar við Hrísmýri á Selfossi.
Var maðurinn ákærður fyrir líkamsárás og gefið að sök að hafa tekið í hálsmál á jakka konu, kippt henni að sér og skallað hana í andlitið með þeim afleiðingum að hún hlaut beinbrot vinstra megin á nefbeini.
Konan gaf skýrslu hjá lögreglu 26. júlí þetta ár. Sagðist hún hafa verið við Hvíta húsið að dansa með vinum sínum þegar maðurinn hafi hrint harkalega í bakið á henni. Hafi hún þá ýtt með olnboganum eða framhandleggnum í hann og öskrað: „Getur þú hætt að fokking hrinda okkur?“
Eftir það hafi hann gripið í hálsmálið á jakka hennar, kippt henni að sér og skallað í andlitið. Höggið hafi lent ofarlega á nefi og enni hennar. Sagði hún að viðbrögð hennar hefðu verið að skvetta úr glasi yfir hann þegar hann var á leið í burtu.
Árásin hafi haft mikil áhrif á hana, hún hafi tímabundið misst sjón á vinstra auganum, fengið heilahristing og beinbrot á nefi. Dagana á eftir hafi hún verið með svima og kastað upp.
Maðurinn gaf skýrslu hjá lögreglu þann 18. ágúst árið 2022. Kannaðist hann ekki við að hafa skallað stelpu á Kótelettunni fyrr um sumarið.
Sagðist hann hafa verið á hátíðinni með félögum sínum. Þegar liðið var á ballið hafi bjór verið skvett í andlitið á honum en hann hafi ekki séð hver það var sem skvetti. Þekkti hann ekkert til umræddrar stelpu.
Um hálftíma síðan hafi gæslan á ballinu komið og beðið hann um að yfirgefa svæðið. En ekkert meira hafi gerst þangað til.
Vitni af atvikinu gáfu einnig skýrslu. Meðal annars eitt vitni, karl, sem sagðist hafa séð manninn skalla konuna. Vitnið sagðist þó hafa verið mjög ölvaður og ekki muna atburðarásina fullkomlega.
Annað vitni, kona, sagðist hafa séð manninn „flugskalla“ konuna sem hafi hellt bjórnum yfir hann og allt orðið „semí brjálað.“
Einnig var lagt fram læknisvottorð dagsett 27. janúar árið 2023 sem sýnir að konan leitaði á Læknavakt 11. júlí og daginn eftir farið í tölvusneiðmynd. Hafi þar komið fram ótilfært brot í nefbeini vinstra megin. Einnig hafi verið einkenni heilahristings.
Eins og áður segir var maðurinn sýknaður af ákærunni. Sagði dómari að framburður hans hefði verið stöðugur. Hins vegar hafi lýsing á atvikum konunnar ekki verið í sömu tímaröð fyrir dómi og í lögregluskýrslu. Það er að fyrir dómi hafi hún sagst hafa skvett áður en hann hafi skallað sig en ekki öfugt. Einnig hafi framburður einhverra vitna verið frábrugðinn því sem fram kom í lögregluskýrslu.
„Er það mat dómsins að sannað megi telja að brotaþoli hafi orðið fyrir árás umrætt sinn, með þeim afleiðingum sem greinir í ákæru. Hins vegar hefur samkvæmt framansögðu ekki komið nægilega fram,þannig að fullyrða megi, að ákærði hafi verið sá sem veittist að henni á þann hátt sem í ákæru greinir,“ segir í niðurstöðu dómsins. „Verður ekki ráðið af gögnum málsins að vitnum er gáfu skýrslu fyrir lögreglu hafi verið sýnd mynd af ákærða til að bera mætti kennsl á hann.“
