Gunnar Smári Egilsson svarar gagnrýnisröddum sumra flokksfélaga sinna í Sósíalistaflokknum fullum hálsi í nýrri Facebook-færslu. Telur hann gagnrýnina í sinn garð undanfarna daga ekki eiga við rök að styðjast og telur hana þvert á móti ósanngjarna og að hann sé vinna gagnlegt starf í þágu sósíalismans og þeirra sem minna mega sín.
Orrahríðin í garð Gunnars Smára hófst síðastliðinn miðvikudag. Sagði Karl Heiðar Kristjánsson forseti ungliðahreyfingar Sósíalistaflokksins sig þá úr kosningastjórn hans og sakaði Gunnar Smára, sem er formaður framkvæmdastjórnar flokksins, um meðal annars ofríki, andlegt ofbeldi og trúnaðarbrot.
Trausti Breiðfjörð Magnússon fyrrum borgarfulltrúi flokksins tók í kjölfarið undir með Karli og sagði ofríki Gunnars Smára eiga þátt í því að hann hafi veikst og þurft að hætta í kjölfarið í borgarstjórn.
Flokksmenn hafa síðan skipst í tvær fylkingar með og á móti Gunnari Smára og hafa deilt mjög og þá ekki síst fyrir opnum tjöldum á samfélagsmiðlum. Lítið hefur hins vegar heyrst frá Gunnari Smára opinberlega þar til nú að hann svarar fyrir sig. Finnst honum ekki mikið til gagnrýni Trausta og Karls koma:
„Ég ræddi við bróður minn á Samstöðinni áðan og heyrði að hann hafði áhyggjur af litla bróður, sem hann passaði oft og dró með sér víða. Það hefur gengið á ýmsu síðustu daga, ég borinn ásökunum um að vera ofbeldismaður, þjófur og margt annað ljótt. Ég er viðfang í einskonar MeToo byltingu ungra karl-sósíalista, sem mér finnst að rugli saman kröfum um afköst og þátttöku við persónulegar ofsóknir. Og sem telja að ég eyðileggi fyrir sósíalismanum og Samstöðinni, geri miklu meira ógagn en gagn.“
Gunnar Smári segist hafa fengið mikið af hvatningarorðum sem hvetji hann til að halda hinni sósíalísku baráttu ótrauður áfram:
„Auðvitað er þetta ekki skemmtilegt. En fjölmargir hafa sent mér kveðjur og hvatningu. Og áðan hringdi ég í bróður minn til að hughreysta hann, sagði honum frá að þegar ég kom í Bónus í Kjörgarði að kaupa mér eitthvað að borða horfði maður í kælinum á mig, stoppaði svo og sagði: Má ég klappa fyrir þér? Og svo klappaði hann og sagðist vera stoltur af baráttu minni. Þetta og margt annað, hvetur mig til að halda áfram og gefast ekki upp fyrir þeim sem vilja breyta Sósíalistaflokknum og Samstöðinni svo þessi fyrirbrigði þjóni betur þeim og þeirra hugmyndum um hvernig eigi að reka umræðuvettvang og fjölmiðil og hvernig eigi að endurfæða sósíalismann inn í okkar samtíma svo hann gagnist þeim sem helst verða fyrir barðinu á óréttlæti þess alræðis auðvaldsins sem við lifum undir.“
Gunnar Smári gerir síðan frekari grein fyrir máli sínu í athugasemdakerfinu við færsluna og segist ekki bera ábyrgð á veikindum Trausta og segir Karl hafa viljað breyta uppbyggingu Sósíalistaflokksins í ólýðræðislegri átt.
