Elon Musk, ríkasti maður heims, er í fararbroddi fyrir niðurskurðaráætlun Donald Trump. Stýrir Musk sparnaðarteyminu DOGE sem fer um víðan völl og sveiflar sparnaðarhnífnum óspart. Musk hefur sagt að hann reikni með að geta skorið útgjöld alríkisins niður um 1.000 til 2.000 milljarða dollara, óþarfa útgjöld að hans mati.

DOGE hefur staðið í ströngu við að reka opinbera starfsmenn, láta hætta ýmsum verkefnum, leggja stofnanir niður og ógilda samninga ríkisins við ýmsa aðila.

Í febrúar kynnti DOGE svokallaðan „kvittana-vegg“ til sögunnar en á honum er sparnaðinum, sem DOGE hefur náð fram með ógildingu samninga, fagnað.

En margar af þessum „kvittunum“ hafa horfið af veggnum án þess að DOGE hafi auglýst það sérstaklega. Skipta þær raunar hundruðum.

Ástæðan fyrir hvarfi þeirra er mistök á mistök ofan hafa verið gerð. Til dæmis virðist starfsfólk DOGE ekki alltaf gera greinarmun á milljónum og milljörðum, að samningar, sem DOGE segist hafa sagt upp, voru löngu runnir úr gildi og samningar sem var þegar búið að greiða að fullu.

Þegar mest var af kvittunum á veggnum, sagðist DOGE hafa sparað 16 milljarða dollara við að segja upp ýmsum samningum. The New York Times skýrir frá þessu og segir að nú séu milljarðarnir orðnir 8.

„Það er augljóst að þau skilja þetta ekki,“ sagði Eric Franklin, forstjóri Erimax, sem veitir ríkisstjórninni ráð um samningagerð og fleira því tengt, í samtali við The New York Times.

Fyrirtæki hans lenti einmitt á „kvittana-veggnum“ því DOGE sagðist hafa ógilt samning við Erimax og hafi sparað 14 milljónir dollara með því. Sá galli var á gjöf Njarðar, að samningurinn var að fullu uppfylltur 2021.

DOGE sagðist hafa sparað bandarískum skattgreiðendum rúmlega 50 milljónir dollara með því að segja einum samningi strandgæslunnar upp. Staðreyndin er að samningurinn var að fullu uppfylltur 2005 og kostnaðurinn við hann var 144.000 dollarar.

„Þetta er eins og naut í postulínsbúð. Hvernig endar það? Í algjöru rugli,“ sagði Franklin.

The New York Times segir að síðustu vikuna hafi rúmlega 1.000 samningar verið fjarlægðir af veggnum. Þeirra á meðal fimm stærstu samningarnir. Þeirra á meðal einn upp á 1,9 milljarða dollara. DOGE varð að fjarlægja hann eftir að fram kom að samningur var felldur úr gildi í nóvember þegar Joe Biden var forseti. Í öðru tilfelli sagði DOGE að samningurinn hafi verið upp á 8 milljarða dollar en í raun var hann upp á 8 milljónir dollara.