JD Vance, varaforseti Bandaríkjanna, mætti í viðtal hjá Fox News og ræddi um sögulegan fund með Zelensky forseta síðastliðinn föstudag, þar sem sauð rækilega upp úr, eins og öll heimsbyggðin varð vör við.

Vance segir að Zelensky hafi ekki einu sinni verið tilbúinn að ræða einstök samningsatriði, hvað þá meira. Hann hafi formælt Pútín í sífellu og það sé ekki leiðin til að ná samningum. Hann skilji samt vel afstöðu Zelenskys og tilfinningar hans enda hafi stríðið leikið Úkraínu afar grátt.

Einn helsti ásteytingarsteininn var krafa Zelenskys um öryggistryggingar af hálfu Bandaríkjamanna og stóð það í veginum fyrir því að hann undirritaði samkomulag við Bandaríkjamenn um vinnslu fágætra málma í Úkraínu. Vance segir að slíkt samkomulag myndi veita Úkraínu miklu meira öryggi heldur en friðargæsluliðar frá NATO. Ekkert tryggi öryggi Úkraínu betur en að Bandaríkjamenn séu að fjárfesta og starfa þar.

Zelensky hefur látið hafa eftir sér eftir fundinn örlagaríka að stríðið eigi eftir að halda áfram í langan tíma enn. Þjóðarleiðtogar í Evrópu hafa keppst við að lýsa því yfir að þeir standi með Úkraínu í stríðinu eins lengi og þurfi. Vance spyr með hvaða peningum eigi að fjármagna endalaust stríð. Hvorki skattborgarar í Evrópu né Bandaríkjunum kæri sig um botnlaus fjárútlát í þennan stríðsrekstur.

Vance segir að sumir leiðtogar í Evrópu tali allt öðruvísi í einkasamtölum um Úkraínustríðið. Þeir berji sér á brjóst opinberlega og segist ætla að standa með Úkraínu fram í rauðan dauðan en í einkasamtölum segi þeir að þetta geti ekki haldið áfram endalaust.

„Þetta getur ekki haldið áfram endalaust. Blóðsúthellingarnar, morðin og efnahagshrunið, þetta setur alla í verri stöðu. Eina leiðin til friðar er planið sem forsetinn Trump er með,“ segir Vance, en viðtalið má sjá í spilaranum hér fyrir neðan.