Óhætt er að fullyrða að andlát leikarans Gene Hackman og eiginkonu hans Betsy Arakawa hafi vakið mikla athygli enda andlátið dularfullt með afbrigðum. Hjónin fundust bæði látin á heimili sínu í Santa Fe en Hackman var 95 ára en Arakawa 65 ára. Hjónin höfðu líklega verið dáin í níu daga þegar þau fundust en það sem hefur einnig vakið furðu er að hundur sem hjónin áttu var líka dauður þegar viðbragðsaðilar komu á vettvangi. Tveir aðrir hundar í eigu hjónanna voru hins vegar sprelllifandi.
Tilkynnt var um að formleg rannsókn væri hafin á andláti hjónanna í síðustu viku en fram hefur komið að engir áverkar voru á líkum hjónanna og þá hefur gaseitrun verið útilokuð.
Réttarmeinafræðingurinn Dr. Michael Baden ræddi við Fox News um andlátið og hann telur hins vegar að allt eigi sér eðlilegar skýringar. Hann telur að atburðarásinn hafi verið á þá leið að Hackman hafi fengið hjartaáfall þar sem hann var að bardúsa í forstofu heimili síns. Hackman átti sögu um slíkt ogvar til að mynda með ígræddan gangráð.
Dr. Baden telur að eiginkona leikarans hafi síðan látist fyrir slysni þegar hún var í ofboði að reyna að koma eiginmanni sínum til hjálpar. Arakawa fannst á gólfinu í nærliggjandi baðherbergi en í herberginu fannst líka pilluglas og pillur á víð og dreif. Þá hafði gashitari fallið um koll og lá á gólfinu.
Sérfræðingurinn telur líklegt að Arakawa hafi í öllu stressinu annaðhvort fallið um koll á gashitaranum, rotast og síðan dáið af innvortisblæðingum eða einfaldlega fengið sjálf hjartaáfall í öllu stressinu sem fylgdi því að reyna koma eiginmanni sínum til bjargar.
Eins og mörgum fannst Dr. Baden dauði hundarins grunsamlegastur og því taldi hann gaseitrun mjög líklega skýringu til að byrja með. Nú hafi hins vegar komið fram upplýsingar um að þessi eini hundur hafði verið lokaður inni, ólíkt hinum tveimur, og því hafi hann að öllum líkindum dáið úr vökvaskorti.
Hackman og Arakawa voru gift í 34 ár og lifðu rólegu lífi fjarri sviðsljósinu hin síðari ár. Þau áttu ekki börn saman en Hackman átti þrjú börn úr fyrra hjónabandi.
