Íslenskur maður var handtekinn á miðvikudag, grunaður um að hafa keypt sér aðgang að barnaníðsefni sem framleitt var af gervigreind. RÚV greinir frá þessu.
Málið er hluti af umfangsmikilli lögregluaðgerð Europol í 19 löndum sem leiddi til handtöku 25 manns. Danska lögreglan hafði frumkvæði í málinu. Eru mennirnir grunaðir um að dreifa barnaníðsefni af ólögráða börnum, sem búið var til af gervigreind.
RÚV ræðir við Bylgju Hrönn Baldursdóttur, hjá kynferðisbrotadeild lögreglunnar á höfuðborgarsvæðinu, en hún segir að lögreglan hér á landi hafi fengið tilkynningu frá Europol um að Íslendingur hafi komið upp í rannsókn dönsku lögreglunnar. Grunur er um að maðurinn hafi keypt aðgang að gervigreindarframleiddu barnaníðsefni.
Danska lögreglan handtók meintan höfuðpaur þessa barnaníðshrings í nóvember í fyrra. Rannsókn Europol er ein af þeim fyrstu sem snýr að því að gervigreind sé notuð til að framleiða barnaníðsefni. Í mörgum löndum er ekki búið að setja lög sem ná utan um brot af þessu tagi en aðildarríki Evrópusambandsins vinna að sameiginlegri löggjöf.
„Það er hægt að nota gervigreind í margt gott en þetta er auðvitað stór galli,“ segir Bylgja Hrönn í viðtali við RÚV.
Uppfært kl. 12:
Lögreglan hefur sent frá sér tilkynningu um málið. Þar kemur fram að húsleit var gerð hjá Íslendingnum sem grunaður er í málinu og var lagt hald á búnað sem núna er til rannsóknar hjá lögreglunni:
„Lögreglan á höfuðborgarsvæðinu og embætti ríkislögreglustjóra tóku þátt í alþjóðlegri lögregluaðgerð á dögunum, en hún snéri að barnaníðsefni sem var búið til með gervigreind. Aðgerðin gekk undir nafninu Cumberland, en hana leiddu dönsk lögregluyfirvöld. Meintur höfuðpaur í málinu er danskur ríkisborgari, sem var handtekinn í lok síðasta árs. Hann er sagður hafa búið til barnaníðsefni og notað til þess gervigreind og síðan selt aðgang að efninu á netinu. Tuttugu og fimm voru handteknir í aðgerðunum, langflestir í fyrradag. Einn þeirra var handtekinn hér á landi og framkvæmd var húsleit í híbýlum hans. Þar var lagt hald á búnað sem er nú til rannsóknar hjá lögreglu.
Um var að ræða samræmdar aðgerðir með fulltingi Europol í sautján Evrópulöndum, auk Ástralíu og Nýja-Sjálands.
Nánari upplýsingar um þessa alþjóðlegu aðgerð er að finna í fréttatilkynningu á heimsíðu Europol, en hana má nálgast hér.“
