Magnea Gná Jóhannsdóttir, borgarfulltrúi Framsóknarflokksins, segir það vera ámælisvert að ekki sé búið að banna umskurð drengja á Íslandi en bann var sett við umskurði stúlkna árið 2005. Í gær féll dómur í Héraðsdómi Norðurlands eystra þar sem móðir, sem hafði látið umskera son sinn, var sýknuð af ákæru um líkamsárás, fyrst og fremst á grundvelli þess að umskurður drengja er ekki ólöglegur á Íslandi.
„Umskurður drengja er varanleg og óafturkræf aðgerð sem felur í sér mikil inngrip á kynfærum barns. Aðgerðin getur valdið barninu sársauka, hættu á sýkingum og varanlegum skaða. Í einstaka tilfellum getur verið læknisfræðilega nauðsynlegt að framkvæma umskurð, til dæmis ef forhúð er of þröng eða í kjölfar alvarlegra sýkinga. Það á þó ekki við um óþarfar og óafturkræfar aðgerðir þar sem fullkomlega eðlilegur vefur sem gegnir mikilvægu hlutverki í kynfæra- og kynlífsheilbrigði drengja er fjarlægður af kynfærum þeirra,“ segir Magnea í grein á Vísir.is.
Árið 2018 lagði Silja Dögg Gunnarsdóttir, þáverandi þingmaður Framsóknarflokksins, fram frumvarp um bann við umskurði drengja en frumvarpið varð ekki að lögum.
Magnea segir:
„Það verður að teljast ámælisvert að ekki sé enn búið að banna óþarfar og óafturkræfar aðgerðir á kynfærum drengja eins og búið er að gera á kynfærum stúlkna og barna sem fæðast með ódæmigerð kyneinkenni (intersex). Þetta hlýtur að vekja upp spurningar um mismunun á grundvelli kyneinkenna, sjálfsákvörðunarrétt barna og trúfrelsi barna,“
Hún bendir á að börn á Íslandi eigi að hafa öruggt skjól og vernd í lögum fyrir óþörfu og óafturkræfu inngripi í líkama þeirra. Hún skorar á Alþingi að leggja fram lög sem banni umskurð drengja:
„Ég skora á Alþingi að grípa til aðgerða með því að setja lög sem banna öll óþarfa inngrip í líkama barna og tryggja þar með öllum börnum sjálfsákvörðunarrétt yfir eigin líkama. Börn eiga njóta verndar frá því að vera skorin án þess að brýn læknisfræðileg rök séu til staðar.“
Greinina má lesa hér.
