Þann 24. febrúar var erlend kona sakfelld í Héraðsdómi Reykjaness fyrir stórfellt fíkniefnasmygl.

Henni var gefið að sök að hafa staðið að innflutningi á rúmlega 1,2 kg af kókaíni með farþegaflugi hingað til lands þann 23. nóvember 2024. Fíkniefnin hafði konan falin innvortis. Voru þau ætluð til söludreifingar hér á landi í ágóðaskyni.

Hafði verið þvinguð til vændis

Konan játaði sök en hún hefur ekki sætt refsingu áður svo vitað sé. Ennfremur segir í dómnum:

„Þá verður ekki ráðið af gögnum málsins að ákærða hafi verið eigandi nefndra fíkniefna eða tekið þátt í skipulagningu á kaupum og innflutningi þeirra til Íslands, að
öðru leyti en að samþykkja að flytja þau til landsins gegn greiðslu. Þá benda gögn málsins til þess að aðstæður ákærðu hafi verið erfiðar og að aðilar hafi hagnýtt sér það. Lögmaður sem aðstoðaði ákærðu við að sækja um hæli í Ítalíu árið 2018 staðfesti í skýrslutöku hjá lögreglu að ákærða hefði verið þvinguð af glæpahópi frá […] til að stunda vændi og hún hafi verið undir ægivaldi hópsins í langan tíma.“

Síðan segir að ekki verði litið framhjá því að konan hafi flutt til landsins umtalsvert magn af sterku kókaíni, sem ætlað hafi verið til söludreifingar hér á landi, og hlutverk hennar við framkvæmd brotsins hafi verið ómissandi hluti af brotastarfseminni.

Var niðurstaðan sú að konan er dæmd í 15 mánaða fangelsi. Dóminn má lesa hér.