Bandaríska tónlistarkonan Norah Jones er væntanleg til Íslands í sumar og mun hún halda stórtónleika í Eldborgarsal Hörpu fimmtudaginn 3. júlí næstkomandi.

Norah er mörgum að góðu kunn en hún er margfaldur Grammy-verðlaunahafi auk þess að hafa gefið út fjölmargar plötur á farsælum ferli sínum.

Í tilkynningu frá tónleikahöldurum kemur fram að fyrsta plata hennar, Come Away With Me, hafi komið út árið 2002.

„Hún vann hug og hjörtu heimsins með sinni einstöku rödd og fékk meðal annars GRAMMY-verðalaunin árið 2003 fyrir bestu plötu ársins, GRAMMY-verðlaun fyrir lag ársins og eins verðlaun sem Besti nýi listamaðurinn . Come away hefur selst í tæpum 30 milljónum eintaka og er ein söluhæsta plata allra tíma. Síðan þá hefur Norah Jones unnið 10 GRAMMY-verðlaun (nú síðast fyrir nýju plötuna VISONS) og tilnefnd 20 sinnum. Hún hefur selt meira en 53 milljónir platna og lög hennar hafa verið streymt tíu milljarða sinnum um heim allan.“

Hún hefur gefið út fjöldann allan af frábærum og vinsælum sólóplötum — Feels Like Home (2004), Not Too Late (2007), The Fall (2009), Little Broken Hearts (2012), Day Breaks (2016), Pick Me Up Off The Floor (2020), tónleikaútgáfan ‘Til We Meet Again (2021), jólaplötuna I Dream Of Christmas (2021) og Visions (2024). Árið 2022 stofnaði Jones sitt eigið hlaðvarp, Norah Jones Is Playing Along, þar sem hún spjallar á skemmtilegu nótunum við uppáhaldstónlistamenn sína.

Miðasala hefst föstudaginn 21. febrúar.