Páll Magnússon, bæjarfulltrúi í Vestmannaeyjum og fyrrverandi þingmaður, hefur fátt gott að segja um áform Arion banka og Íslandsbanka um sameiningu.
Bankarnir hafa lýst yfir vilja til að sameinast en alls óvíst er hvort Samkeppniseftirlitið heimili slíkan samruna.
Páll staldrar við þann málflutning Arion banka að með samrunanum sé hægt að tryggja fimm milljarða króna á ári í sparnað fyrir neytendur. Þarna telur Páll fulltrúa bankans vera að reyna að slá ryki í augu almennings. Páll telur að auðveldara verði að okra á neytendum þegar viðskiptabönkunum hefur fækkað úr þremur í tvo. Hann skrifar á Facebook-síðu sína:
„Arion banki segir að hægt verði að tryggja neytendum 5 milljarða árlegan sparnað með samruna við Íslandsbanka. Hér er siglt undir fölsku flaggi eins og venjulega þegar bankarnir eiga í hlut. Hvatinn er ekki umhyggja fyrir neytendum heldur stjórnlaus græðgi. Þegar bankaskatturinn var lækkaður um meira en helming 2020 var það gert með fyrirheitum um að ávinningurinn, um 9 milljarðar króna á ári, ætti að koma neytendum til góða í lægri þjónustugjöldum og minni vaxtamun. Þau fyrirheit voru aldrei efnd; bankarnir hirtu allan ávinninginn sjálfir. Það myndu þeir líka gera nú – og okrið orðið enn auðveldara þegar bara tveir viðskiptabankar stæðu einir eftir. Sporin hræða.“
