Guðmundur Ingi Þóroddsson, formaður Afstöðu, vill greiðari aðgang fanga að netinu. Segir hann Ísland vera langt á eftir hvað þetta varðar.
„Það þarf þá að tryggja að allir hafi greiðan aðgang að netfanginu sínu,“ segir Guðmundur í færslu á samfélagsmiðlum. Vísar hann til fréttar RÚV um að nánast allur póstur berist nú sem tölvupóstur en ekki bréfpóstur.
„Ef ég man rétt þá eru komin allavega 15 ár síðan sett var í lög í Danmörku að allir verði að fá aðgang að netfanginu sínu og þá er auðvitað átt við þá sem eru á einn eða annan hátt frelsisskertir,“ segir Guðmundur Ingi og gantast með að Íslendingar séu nú reyndar oft enn aftarlega á merinni hvað önnur mál varðar.
„Nú þarf að fara vinna af stað og tryggja öllum sem búa við frelsisskerðingu meiri aðgang að internetinu enda ekki hægt að tefja þetta lengur,“ segir hann.
DV fjallaði um netnotkun fanga í íslenskum fangelsum haustið 2023. Þá kom fram að fangar í lokuðum fangelsum hafa aðgang að nettengdri tölvu í sameiginlegu rými. Er það gert til þess að þeir geti fylgst með gangi þjóðmála og sinnt persónulegum erindum gagnvart opinberum stofnunum og sinnt námi eða vinnu.
Ekki mega þeir hafa nettengda tölvu í klefum sínum, ekki nýta samfélagsmiðla, ekki skrifa athugasemdir á fréttamiðlum og ekki hlaða niður afþreyingarefni eins og kvikmyndum eða tölvuleikjum. Notkun VPN þjónustu er óheimil sem og að eyða vafrasögu.
