Eins og oft vill verða í Eurovision er nú rætt um að lagi hafi verið stolið. Nánar tiltekið að sænsk hljómsveit í undankeppni hafi stolið lagi af sjálfum Geirmundi Valtýssyni.

Sænska söngvakeppnin Melodiefestivalen stendur nú sem hæst en þar verður valið lag til að taka þátt fyrir hönd Svíþjóðar í Eurovision í svissnesku borginni Basel í vor. Á meðal keppenda er kvennatríó sem kallar sig Schlagerz og flytur lagið Don Juan. Um er að ræða sveiflu-lag sem þykir minna afskaplega mikið á lag Geirmundar Valtýssonar. Svo mikið að það sé jafn vel stolið.

Lagið sem rætt er um að hafi verið stolið kallast Ég hef bara áhuga á þér af plötunni Á fullri ferð frá árinu 1991.

Geirmundur sjálfur gerir hins vegar ekki mikið úr þessum umræðum. En hann ræddi málið í viðtali í þættinum Reykjavík síðdegis á Bylgjunni í gær.

„Ég hef bara gaman að þessu,“ sagði sveiflukóngurinn skagfirski. „Þetta eru mikil sveiflulönd, bæði Svíþjóð og Noregur. Við vitum með La det swinge, hvaðan það kom, og vitum líka hvaðan Waterloo kom. Þetta er allt sama dæmið. Ég er náttúrulega mjög ánægður að heyra það að tónlistin mín er greinilega spiluð eitthvað þarna úti.“

Sjálfur telur hann meiri líkindi með hinu sænska lagi og laginu Vertu af plötunni Í synjandi sveiflu frá árinu 1989. En það söng hann með Helgu Möller.

„Swingið má nú fara að koma aftur því að lögin eru orðin svo róleg núna, mikið af lögum,“ sagði Geirmundur. „Gleðin finnst oft með swing taktinum.“