DV greindi frá því fyrir nokkrum vikum að ráðist hefði verið á konu að nafni Svandísi Ástu fyrir utan veitingastaðinn Mónakó við Laugaveg og hún slegin bylmingshöggi í andlitið.
Svandís Ásta rotaðist við höggið og var flutt með sjúkrabíl á bráðamóttöku Landspítalans. Framtönn í henni brotnaði í tvennt við höggið auk þess sem hún tognaði á öxl vegna falls í götuna.
„Það er hægt að fara í sígó bak við hús í sundinu þarna og ég var á leiðinni þangað en um leið og gekk út fékk ég högg í andlitið. Ég sá ekki hver gerði þetta og bara rotaðist samstundis. Höndin skaust bara fyrir hornið og framan í mig. Svo man ég ekki fyrr en sjúkraflutningamennirnir komu.“
Svandís Ásta segir í samtali við DV að málið hafi verið í rannsókn lögreglu sem hafi fengið gögn úr myndeftirlitsbúnaði á Mónakó til skoðunar. Rannsókn málsins er lokið án þess að lausn hafi fundist. Myndirnar sýna mann, sem Svandís Ásta segist ekki kannast við, gefa sig að henni og jafnframt leiða hana með mjög ákveðnum hætti út af staðnum.
Svandís Ásta segist hafa misst minnið inni á staðnum og á bráðamóttökunni hafi hún verið greind með minnisleysi. Hún telur að maðurinn á myndunum hafi byrlað henni ólyfjan. Hún segir aðspurð í samtali við DV að hún hafi aldrei séð manninn áður og hann sé ekki starfsmaður á Mónakó.
Rétt er að taka fram að ályktanir Svandísar Ástu í Facebook-færslu hennar um málið eru hennar eigin og DV hefur ekki sannanir fyrir þeim. En hún skrifar:
Kannast einhver við þennan mann sem að mjög sennilega hefur byrlað mér smjörsýru af því að ég man ekki neitt eftir því að hafa farið með honum út af Mónakó?
Á fyrstu myndinni þá heldur hann á bjórnum mínum og ég er að reyna að ná honum til baka frá honum.
Hann hefur laumað smjörsýrunni í bjórinn minn án þess að ég hafi tekið eftir því.
Ég er búin að Googla áhrif af smjörsýru og hún veldur algjöru minnisleysi og það stendur í læknaskýrslu að ég hafi verið með einkenni minnisleysis.
Hann leiðir mig út af staðnum og ég man ekkert eftir því. Síðan fór hann með mig upp á Barónsstíg 18 þar sem að ég er kýld í andlitið rosalega föstu höggi og það brotnaði í mér hægri framtönnin og hægri öxlin á mér er brotin.
Þetta er mjög alvarleg líkamsárás og lögreglan sendi mér bréf inn á island.is að rannsókn málsins væri lokið eftir aðeins einn mánuð.
Mér grunar að þetta sé haturs glæpur og að þessi maður á myndunum sé múslimi.
Ég var búin að drekka mjög lítið þetta kvöld og ég reyni eftir fremsta megni að drekka mig ekki drukkna af víni af því að það stendur í Biblíunni: „Drekkið ykkur ekki drukkna af víni“
Ég er spilafíkill og skammast mín ekkert fyrir það og ég er líka alkóhólisti sem að finnur sig ekki inn í AA samtökunum.
Ég veit að ég er syndari og það er þess vegna sem ég þarf á frelsara að halda sem er Jesús Kristur.
Hann sagði við mig um daginn með svo blíðri röddu „Þú ert hólpin af náð fyrir trú“
Þið megið dæma mig eins og þið viljið mér er alveg sama hvað ykkur finnst um mig en mér er ekki sama hvað Guði finnst um mig!
