Sjúkratryggingar Íslands (SÍ) hafa tjáð sig um meint brot konu í starfi sem ákærð hefur verið fyrir að hafa falsað kröfur í tölvukerfi stofnunarinnar að fjárhæð 156.298.529 krónur. Meint brot konunnar stóðu yfir í 11 ár en hún starfaði sem verkefnastjóri hjá stofnuninni. Héraðssaksóknari hefur nú ákært konuna fyrir skjalafals en synir hennar tveir sem taldir eru hafa tekið þátt í brotunum hafa verið ákærðir fyrir peningaþvætti.
Í svari SÍ við fyrirspurn DV um málið segir að það hafi komið upp vorið 2024 er starfsmenn SÍ uppgötvuðu misræmi í gögnum. Nánari skoðun hafi leitt til rökstudds gruns um umfangsmiklar svikagreiðslur:
„Vorið 2024 uppgötvuðu starfsmenn Sjúkratrygginga misræmi í gögnum við greiningar á umfangi og eðli endurgreiðslna vegna erlends sjúkrakostnaðar. Nánari skoðun leiddi til rökstudds gruns um umfangsmiklar svikagreiðslur sem gerðar voru með útgáfu tilhæfulausra reikninga af hálfu starfsmanns Sjúkratrygginga. Þegar var gripið til viðeigandi ráðstafana sem fólu m.a. í sér að kalla til lögreglu sem tók við rannsókn málsins sem nú hefur leitt til ákæru. Málið er nú til meðferðar hjá viðeigandi yfirvöldum.“
Í svarinu kemur fram að búið er að grípa til ráðstafana til að fyrirbyggja að brot af þessu tagi geti endurtekið sig:
„Sjúkratryggingar hófu strax ítarlega vinnu í framhaldi af því að þetta mál kom upp við að greina þær aðferðir sem starfsmaðurinn beitti og tryggja varnir gegn því að slíkt geti endurtekið sig, m.a. með breyttu verklagi. Þá stendur yfir umfangsmikil vinna tengd innra eftirliti stofnunarinnar.“
