Tíu voru skotnir til bana og féll meintur árásarmaður, hinn 35 ára gamli Rickard Andersson, svo fyrir eigin hendi.
TV4 hefur greint myndband sem Hashem Shams, nemandi við skólann, tók þegar hann faldi sig inni á salerni á sama tíma og Rickard var fyrir utan þar sem hann skaut á fólk.
„Þið ættuð að yfirgefa Evrópu,“ heyrist á upptökunni rétt áður en tveir skothvellir heyrast. Í frétt TV4 kemur fram að ekki sé hægt að fullyrða að árásarmaðurinn hafi látið þessi orð falla.
Sænska lögreglan hefur sagt að ekkert bendi til þess að árásin hafi verið „hugmyndafræðilegs“ eðlis en Expressen segir að einhverjir sýrlenskir ríkisborgarar hafi verið á meðal fórnarlamba árásarinnar. Í skólanum er meðal annars boðið upp á tungumálakennslu fyrir innflytjendur.
Greint var frá því í gær að árásarmaðurinn hafi verið búsettur í Örebro og ekki komið við sögu lögreglu áður. Hann hafi verið einfari og verið búinn að einangra sig mikið undanfarin misseri.
„Hann var einfari og við höfum ekki átt mikil samskipti við hann á síðustu árum. Sem barn var hann dálítið öðruvísi en fjörugur. Honum gekk vel í skóla en hann hafði átt erfitt uppdráttar á síðustu árum,“ hafði Aftonbladet eftir einstaklingi sem þekkti til hans.
Í frétt BBC kemur fram að Rickard hafi stundað nám við þennan sama skóla og var því vel kunnugur byggingunni. Hann er sagður hafa stundað nám þar síðast árið 2021 að hann hætti að mæta.
Sex eru særðir eftir árásina og þar af fimm alvarlega, þrjár konur og tveir karlar. Ástand þeirra mun þó vera stöðugt.
