Bandarískir fjölmiðlar eru byrjaðir að varpa ljósi á þá 67 sem létust í hinu hörmulega flugslysi í Washington í fyrrinótt. Eins og komið hefur fram voru fyrrverandi heimsmeistarar á listskautum í hópi farþega sem og keppendur í listskautum sem höfðu tekið þátt í móti.

The Enquirer greinir einnig frá því að í hópi farþega hafi verið Elizabeth Anne Keys sem var lögfræðingur að mennt. Hún var í Kansas í vinnuferð og tók flugið heim fyrr en hún ætlaði til að komast á stefnumót með kærasta sínum til sex ára, David Seidman. Svo vildi til að Elizabeth átti 33 ára afmæli þennan örlagaríka dag.

„Hún var ótrúleg unnusta og gerði alla í kringum sig að betri manneskjum,“ segir David.

Sjá einnig: Fyrrverandi heimsmeistarar voru um borð í vélinni

Meðal annarra sem létust voru mæðgurnar Justyna Beyer, 42 ára, og Brielle Beyer, 12 ára. Þær höfðu verið á móti í Wichita þar sem Brielle var að keppa á listskautum. Hún hafði gengið í gegnum ýmislegt á lífsleið sinni en hún greindist með krabbamein þegar hún var aðeins fjögurra mánaða gömul.

„Hún barðist eins og ljón í öllu sem hún tók sér fyrir hendur,“ segir faðir hennar og eiginmaður Justynu, Andy Beyer. Andy og sex ára sonur þeirra hjóna standa nú eftir tveir.

Flugmaður vélarinnar, Samuel Lilley, hafði nýlega trúlofað sig, að sögn systur hans, Tiffany Gibson. „Hann var mögnuð manneskja og elskaði að vera í kringum fólk. Hann var ævintýragjarn og elskaði að ferðast,“ segir Tiffany við ABC.