Félag íþrótta-, æskulýðs- og tómstundafulltrúa (FÍÆT) hefur sent sveitarfélögum landsins bréf til þess að mótmæla áfengissölu á íþróttaviðburðum á landinu. Segir félagið að hún auki hættu á óviðeigandi hegðun. Fyrirmyndirnar séu líka í stúkunni.
„Félag íþrótta-, æskulýðs- og tómstundafulltrúa á Íslandi (FÍÆT) lýsir yfir þungum áhyggjum vegna áfengissölu á íþróttaviðburðum á Íslandi,“ segir í bréfinu sem sent var til sveitarfélaga, sem veita leyfi til áfengissölu á íþróttaviðburðum.
Áfengissala á íþróttaleikjum hefur aukist á Íslandi á undanförnum árum, einkum á leikjum meistaraflokka og algengt er að sjá áhorfendur með bjór. Stundum hafa leyfamál ekki verið í lagi varðandi þessa áfengissölu.
Bent er á að íþróttastarf á Íslandi sé mikilvægur og öflugur vettvangur heilsueflingar, forvarna og félagslegs þroska. Einkum hjá börnum og unglingum. Sala á áfengi á íþróttaviðburðum gangi þvert gegn tilgangi íþrótta og sendi röng skilaboð um tilgang íþróttastarfseminnar.
„FÍÆT bendir á að áfengissala á íþróttaviðburðum stuðli að aukinni hættu á óviðeigandi hegðun áhorfenda, neikvæðum áhrifum á fjölskylduvænt umhverfi og grafi undan þeim gildum sem íþróttir standa fyrir, svo sem jákvæðum félagsþroska og heilbrigðum lífsstíl,“ segir í bréfinu. „Fyrirmyndir barna og ungmenna eru bæði innan vallar en líka í stúkunni og mikilvægt er að fyrirmyndir í stúkunni séu líka til fyrirmyndar.“
Leggur félagið áherslu á að tryggja heilbrigt umhverfi fyrir öll sem taki þátt í íþróttastarfi á Íslandi. Skorað er á stjórnvöld, sveitarfélög, íþróttasérsambönd, íþróttafélög og skipuleggjendur íþróttaviðburða að standa vörð um gildi íþróttahreyfingarinnar og tryggja að ekki sé selt áfengi á íþróttaviðburðum. Einnig er hvatt til frekari umræðu um ábyrga stefnumótun þegar kemur að áfengissölu í tengslum við samfélagslega viðburði.
