Ljósleiðari hefur í tvígang rofnað í Húnavatnssýslum undanfarna mánuði og svæði orðið net- og símasambandslaus. Sveitarstjórn Húnabyggðar lýsir yfir þungum áhyggjum af stöðu mála og tryggja þurfi varaleiðir til að öryggi íbúa sé tryggt.
Fyrra atvikið var þann 9. desember þegar ljósleiðari sunnan við Skagaströnd slitnaði í miklum vatnavöxtum í Hrafná. Allt net- og símasamband á Skagaströnd rofnaði sem og í nærliggjandi sveitum á Skaga, sem tilheyra Húnabyggð.
Alexandra Jóhannesdóttir, sveitarstjóri Skagastrandar, sagði í viðtali við RÚV um málið að það hefði skapast „almannahættuástand.“ Þetta er ekki í fyrsta skipti sem ljósleiðari rofnar við bæinn, það gerðist einnig árið 2022. Sagði hún hægt að laga málið með hringtengingu ljósleiðara, en hann er eintengdur í dag.
Seinna atvikið var 15. janúar þegar ljósleiðari rofnaði í Svartárdal. Urðu bæirnir Hvammur og Stafn net- og símalausir vegna þessa. Einnig flæddi ís og krapi yfir veginn og lokaði aðgengi að bæjunum tveimur. Urðu þeir því alveg innlyksa.
Byggðarráð og sveitarstjórn Húnabyggðar hefur lýst yfir þungum áhyggjum vegna þessa.
„Byggðarráð telur það með öllu óásættanlegt að árið 2025 sé hægt að kippa fólki úr net- og símasambandi við umheiminn og þar með ógna öryggi fólks,“ segir í bókun. „Það er mikilvægt að allir leggist á eitt hvort sem það er ríki, sveitarfélög og/eða fjarskiptafyrirtæki um að finna lausn á þessu almannarvarnarástandi sem skapast hefur með stuttu millibili í Austur-Húnavatnssýslu og ógnar öryggi, lífi og heilsu fólks. Það er óhjákvæmilegt að bilanir verði í fjarskiptakerfum okkar en tryggja verður að fólk hafi varaleiðir þannig að öryggi íbúa sé tryggt.“
