Þorbjörg Sigríður Gunnlaugsdóttir, dómsmálaráðherra, segir mikilvægt að halda umræðunni um hnífaburð ungmenna á lofti til að snúa þróuninni við. Minnir hún á að lágmarkssekt hafi verið fimmtánfölduð og slíkt brot fari nú á sakaskrá.
„Hnífaburður hefur mikið verið til umræðu, ekki síst sú staðreynd að hnífaburðar ungmenna er vaxandi vandi,“ segir Þorbjörg í færslu á samfélagsmiðlum í dag. „Við verðum að halda þeirri umræðu lifandi og bregðast við með markvissum hætti.“
Minnir hún á að lágmarkssekt fyrir vopnaburð á almannafæri hafi verið margfölduð, það er hækkuð úr 10 þúsund krónum í 150 þúsund. Það hafi meðal annars þær afleiðingar að brotið fer á sakaskrá viðkomandi.
„Með því eru send skýr skilaboð. Vopnaburður er alvörumál og viðbrögðin við slíkum brotum eru í samræmi við það,“ segir Þorbjörg. „Auðvitað leysir þetta skref ekki vandann eitt og sér. Það er hins vegar mikilvægt skref samhliða auknum forvörnum og fræðslu. Og ég fagna þess vegna þessum nýju fyrirmælum ríkissaksóknara. Ég hvet fólk til að tala um þetta vandamál sín á milli. Sérstaklega við unga fólkið okkar.“
Mikilvægt sé að allt sé reynt til að snúa þessari hættulegu þróun við. Meðal annars að upplýsa unga fólkið um refsingarnar og afleiðingarnar og hið augljósa að vopnaburður geti aldrei leitt neitt gott af sér.
En refsingar séu ekki eina leiðin til þess að minnka vopnaburð á almannafæri. Einnig þurfi að nota aðrar leiðir eins og að efla samfélagslöggæslu. Þess vegna hafi ríkisstjórnin ákveðið að fjölga lögreglumönnum til framtíðar.
Þá þurfi að vinna málið á breiðum grunni. Það er með samvinnu heimila, skóla, geðheilbrigðisþjónustu og löggæslu.
„Margir sem bera hníf á sér segja að þeir geri það því þeir upplifa sig ekki örugga, þrátt fyrir að ekkert bendi til þess að öryggi þeirra sé ógnað,“ segir Þorgbjörg að lokum. „Ég hef fulla trú á að við getum spornað gegn þessari þróun og það er markmiðið. Ísland er öruggt og gott land en við megum ekki taka því sem sjálfgefnu. Öryggi fólksins í landinu er fyrsta skylda stjórnvalda – og öryggistilfinning fólks er um leið mikilvæg. Fólk á að upplifa sig öruggt. Vopnaburður fólks á götum úti er ekki veruleiki sem við viljum þola á Íslandi.“
