Stórfurðulegt atvik átti sér stað í hlaðvarpi í Bandaríkjunum á dögunum. Rappari var þar í viðtali í hljóði og mynd en skaut óvart úr skammbyssu innanklæða þannig að nokkurt uppnám varð.
Rapparinn sem um ræðir kallar sig OG 2 LOW og var í viðtali í hlaðvarpsþættinum „1 on 1 w/Mike D.“
Eins og sést í myndbandinu var Mike D að spyrja OG út í lífshlaup hans þegar hinn síðarnefndi fer eitthvað að bisa við buxnavasann sinn. Skyndilega heyrist hvellur og OG bregður mikið.
„Hver skaut hvern?“ spyr Mike D. „Var einhver skotinn?“ En OG sat í sæti sínu með stjarfan svip.
Hafði OG óvart hleypt af skoti úr byssu í vasanum en til allrar lukku varð skaðinn ekki mikill. Fullvissuðu Mike D og OG hlustendur um að allt væri í lagi og héldu áfram með viðtalið. Seinna kom í ljós að OG hafði fengið skrámu á fótlegginn.
Viðtalið hefur vitaskuld vakið mikið umtal á netinu. En ekki fyrir umræðurnar um líf og störf OG 2 LOW heldur byssuöryggi.
Hefur atvikinu verið líkt við atvik frá árinu 2008 þegar NFL leikmaður að nafni Plaxico Burress skaut sig óvart í lærið á næturklúbbi. Burress var með Glock byssu í vasanum á skemmtistaðnum LQ í New York og líkt og hjá OG í áðurnefndu viðtali var öryggið ekki á.
Engan annan sakaði í það skiptið en Burress þurfti læknisaðstoð á spítala. Var hann ákærður fyrir atvikið og þurfti að greiða háa sekt, bæði til yfirvalda og til liðsins sem hann spilaði fyrir, New York Giants. Burress hefur eftir þetta barist fyrir hertum reglum um skotvopn.
Líkt og Burress hefur OG fengið mikla gagnrýni fyrir að mæta með byssu innanklæða í viðtalið. Einnig hefur verið gagnrýnt hversu auðvelt það er fyrir óábyrgt fólk að útvega sér skotvopn, og vera með það á sér á meðal almennings eða við vinnu.
Bent hefur verið á að þó að rapparinn hafi sloppið bærilega og enginn annar hafi slasast þá hafa iðulega komið upp atvik sem hafa ekki endað á jafn farsælan máta. Heldur jafn vel með stórslysum eða dauða.
