Nú stendur yfir fundur borgarstjórnar Reykjavíkur. Meðal þess sem er á dagskrá er beiðni Dags B. Eggertssonar formanns borgarráðs um lausn frá störfum borgarfulltrúa fram til loka kjörtímabilsins. Eins og kunnugt er var Dagur kjörinn á Alþingi í kosningunum í nóvember. Dagur hefur setið í borgarstjórn frá 2002 og var borgarstjóri í tæp 10 ár samtals. Hann þakkar fyrir sig og segist ganga stoltur og sáttur frá störfum sínum fyrir Reykjavíkurborg.
Dagur ritar á Facebook-síðu sína:
„Búið að vera magnaður tími – og miklu lengri en ég ætlaði. Við Arna (Arna Einarsdóttir eiginkona Dags, innsk. DV) ætluðum „bara að prófa“, fluttum heim til Íslands, tveir unglæknar, kláruðum nám og hófum að eignast börnin okkar dásamlegu. Þau eru núna flest vaxin okkur yfir höfuð og orðin fjögur!
Ég er ótrúlega þakklátur fyrir þennan tíma og þakklátur því fólki sem ég hef unnið með á vettvangi borgarstjórnar og hjá Reykjavíkurborg. Þið eruð ótrúlega mörg og ég vona að þið vitið hver þið eruð!
Ég vil líka þakka þeim ótal mörgu borgarbúum og landsmönnum sem ég hef fengið að kynnast og vinna með á þessum tíma. Þvílíkt fólk og hvílík forréttindi að fá að vinna á þessum vettvangi. Ég vona að þið ræktið samskiptin og samstarfið við mig sem mest og best í mínu nýja starfi sem þingmaður á Alþingi. Ég elska Reykjavík! Takk fyrir mig!“
Dagur birtir með færslunni eintak af lausnarbeiðni sinni til borgarstjórnar. Þar segir hann það hafa verið forréttindi að fá að starfa sem borgarfulltrúi og borgarstjóri og hann sé ánægður með sín verk á þessum árum sem hann hefur gengt þessum stöðum:
„Á þeim tíma sem liðinn er síðan ég tók sæti í borgarstjórn hefur Reykavík vaxið og dafnað og sótt fram á fjölmörgum, ef ekki öllum sviðum. Það hefur verið stórkostlegt að taka þátt í umbreytingu borgarinnar og þessu mesta framfara og vaxtarskeiði hennar.“
Ljóst er að Dagur er umdeildur og í ljósi langrar setu í stóli borgarstjóra hefur hann haft mikil áhrif á þróun Reykjavíkur og sitt sýnist hverjum en við færsluna eru þó aðeins ritaðar athugasemdir sem einkennast af hlýju og þakklæti.
Einnig verða teknar fyrir á fundi borgarstjórnar lausnarbeiðnir Kolbrúnar Áslaugar Baldursdóttur borgarfulltrúa Flokks fólksins og Rögnu Sigurðardóttur varaborgarfulltrúa Samfylkingarinnar. Báðar voru þær eins og Dagur kjörnar á þing í kosningunum í nóvember. Kolbrún óskar hins vegar eftir lausn frá störfum fram til 18. febrúar þegar þingnefnd um niðurstöður kosninganna á að skila af sér niðurstöðu. Segist Kolbrún að því loknu ætla að leggja fram nýja lausnarbeiðni og þá til loka kjörtímabilsins að því gefnu að nefndin staðfesti niðurstöður kosninganna.
Ragna óskar hins vegar eftir lausn frá störfum til loka kjörtímabilsins þar sem hún geti ekki vegna óhóflegs álags sinnt skyldum sínum í borgarstjórn vegna annarrar vinnu ( sem alþingismaður, innsk. DV)
