Samfylkingin fær að finna hressilega fyrir því í staksteinum Morgunblaðsins í dag en þar er fjallað um ráðninguna á Þórði Snæ Júlíussyni í starf framkvæmdastjóra þingflokks Samfylkingarinnar.

Sjá einnig: Þórður Snær verður framkvæmdastjóri þingflokksins

Eins og frægt er orðið var Þórður Snær ofarlega á framboðslista flokksins í Reykjavík fyrir kosningarnar sem fram fóru í nóvember, en hann hann lýsti því yfir að hann myndi ekki taka sæti á Alþingi í kjölfar mikillar umfjöllunar um óviðeigandi bloggskrif hans á árunum 2004 til 2007.

Var í skrifunum meðal annars fjallað með niðrandi og óviðurkvæmilegum hætti um nafngreindar og þekktar konur.

Sjá einnig: Verstu skrif Þórðar Snæs úr blogginu alræmda – „Hún var ekki með brjóst, samt með vömb, stóran rass, stuttar lappir, gróft hár og þrútið andlit“

Staksteinahöfundur Morgunblaðsins gagnrýnir ráðninguna á Þórði Snæ harðlega.

„Und­ir kvöld­mat á föstu­dag kom „lít­il til­kynn­ing“ á Facebook, en þá til­kynnti Þórður Snær Júlí­us­son í aðeins 84 orðum að hann hefði tekið til starfa sem fram­kvæmda­stjóri þing­flokks Sam­fylk­ing­ar. Aðeins eru tveir mánuðir frá því að Þórður Snær til­kynnti í 824 orðum að hann tæki ekki þing­sæti fyr­ir Sam­fylk­ingu næði hann kjöri,“ segir í staksteinum Moggans í dag.

„Þórður Snær nefn­ir ekk­ert sem breyst hafi á þess­um tveim­ur mánuðum, sem geri það að verk­um að hann sé nú til­val­inn til að „hjálpa við að breyta sam­fé­lag­inu til hins betra með öfl­ugri rík­is­stjórn Kristrún­ar Frosta­dótt­ur og frá­bær­um hópi þing­manna“.“

Að mati staksteinahöfundar mun Þórður Snær ugglaust nýtast Samfylkingunni á þingi en hann spyr síðan:

„En geta kjós­end­ur annað en spurt sig hvort allt orðagjálfrið þegar hann sagðist ekki taka kosn­ingu hafi verið annað en hræsni, bein­lín­is til þess að blekkja kjós­end­ur? Nú er hann umyrðalaust bú­inn að koma sér fyr­ir í þing­inu á kostnað al­menn­ings, en al­menn­ing­ur fékk ekk­ert um það að segja. Kjós­end­ur höfðu ekk­ert val um það og geta ekki einu sinni hafnað hon­um í næstu kosn­ing­um.“

Þess má geta að heillaóskum hefur rignt yfir Þórð Snæ í athugasemdum á Facebook-síðu hans og koma þær meðal annars frá núverandi og fyrrverandi þingmönnum. „Gott að vita af þér á góðum stað. Gangi þér vel,“ segir til dæmis Þórhildur Sunna Ævarsdóttir. „Frábærar fréttir. Innilegar hamingjuóskir með starfið,“ segir Ragnar Þór Ingólfsson. „Mikið er ég glöð. Gangi þér áfram vel. Þú ert mikilvægur,“ segir Rannveig Guðmundsdóttir sem sat á þingi fyrir Samfylkinguna á árunum 2003 til 2007.