Hilmar Þór Björnsson, arkitekt, telur að hægt sé að leysa Álfabakkamálið. Það kosti pening en sé þannig séð auðvelt að leysa. Erfiðara sé að endurvekja traust almennings á skipulagi Reykjavíkurborgar eftir málið.
„Manni sýnist að þetta Álfabakkamál sé að verða mjög stórt og slæmt. Og það fer stækkandi. En það má bjarga því,“ segir Hilmar í færslu á samfélagsmiðlum þar sem hann reifar málið og þær lausnir sem standa til boða. „Það er líklega, úr því sem komið er, rétt að taka húsið niður og endurreisa á viðeigandi stað þar sem það verður byggt i samræmi við aðalskipulag.“
Að mati Hilmars stenst byggingin varla aðalskipulag og telur hann að málsmeðferð byggingafulltrúa hafi líklega ekki verið í samræmi við reglugerð. Kynningarferli og viðbrögð við athugasemdum hafi heldur ekki verið í samræmi við anda laganna um grenndarkynningu.
„Tímalína allra samninga virðist ekki standast venjur. Byggingarleyfi er að sögn gefið út áður en hönnun er lokið. Jafnvel er því haldið fram að teikningar af húsinu hafi legið fyrir áður en deiliskipulagið var samþykkt,“ segir Hilmar.
Bendir hann á að aðalhönnuðir skemmunnar séu jafn framt höfundar deiliskipulagsins. Spyr hann hverra hagsmuna skipulagshöfundarnir hafi verið að gæta við deiliskipulagsgerðina. Hagsmunum almennings eða sérhagsmuna væntanlegra lóðarhafa?
„Mín skoðun er sú að það á helst aldrei að gerast að sami aðilinn gæti almannahagsmuna og á sama tíma sérhagsmuna lóðarhafa nema í undantekningartilfellum. Þetta er prinsipp atriði sem flokkur formanns skipulagsráðs ætti að skilja,“ segir Hilmar. „Það var að mínu mati á sínum tíma skynsamlegt að sameina byggingarnefnd og skipulagsnefnd i umhverfis- og skipulagsráð. En reynslan er önnur. Þetta er beinlínis hættulegt. Þetta fyrirkomulag veldur ruglingi og ógegnsæi.“
Hafi það komið fram að fólk sé á flótta úr íbúðum í Búseta húsinu. Umhverfissálfræðingur telji skipulagið heilsuspillandi.
„Þetta er flóttafólk sem þarf að flýja heimili sitt og samfélag. Ekki vegna stríðsátaka eða náttúruhamfara heldur vegna þess að ófaglega var staðið að skipulagi i Suður Mjódd,“ segir Hilmar.
Segir hann að málið sé tvíþætt. „Annars vegar þessi, að því er virðist skipulagsmistök sem er auðvelt að leysa en kostar mikið fyrir borgarsjóð og það er að taka niður skemmuna. Hitt vandamálið er að endurvekja traust á skipulagi borgarinnar sem er i algeru lágmarki nú um stundir er stærra og vandleysanlegra,“ segir hann.
