Seðlabanki Íslands vekur athygli íslenskra neytenda á fréttatilkynningu frá Evrópsku vátrygginga- og lífeyrissjóðaeftirlitsstofnuninni (EIOPA). Þar er að finna upplýsingar sem settar eru upp sem spurt og svarað um stöðu slóvakíska tryggingafélagsins NOVIS.
Félagið var mikið í fréttum árið 2020 eftir að athugasemdir voru gerðar við sölu tryggingaafurða félagsins bæði hér á landi og í Slóvakíu. Ungverska fjármálaeftirlitið bannaði nýsölu afurða félagsins árið 2018 og Seðlabanki Slóvakíu afturkallaði starfsleyfi félagsins í júní árið 2023. EIOPA vekur nú athygli viðskiptavina NOVIS á hugsanlegri áhættu við áframhaldandi iðgjaldagreiðslur til félagsins og áhrifum af mögulegri skiptameðferð þess. Frá því að starfsleyfið var afturkallað hefur Seðlabanki Slóvakíu haft takmarkaðar eftirlitsheimildir gagnvart starfsemi félagsins og því liggja ekki fyrir áreiðanlegar upplýsingar um fjárhagsstöðu þess. Seðlabanki Íslands getur því ekki fullyrt að fjárhagsstaða NOVIS sé nægilega trygg til að mæla með að vátryggingartakar haldi áfram að greiða iðgjöld.
NOVIS hefur verið óheimilt að gera nýja vátryggingasamninga síðan í júní 2023 og getur aðeins sinnt þeim verkefnum sem nauðsynleg eru til að þjónusta núverandi samninga, svo sem að innheimta iðgjöld og gera upp kröfur. Slitastjóri hefur enn ekki verið skipaður. Vegna yfirstandandi dómsmála er óvíst hvort og hvenær sú ákvörðun verður tekin af dómstólum. Núverandi staða getur leitt til tjóns á hagsmunum neytenda en vátryggingartakar eiga á hættu að verða fyrir tjóni haldi þeir áfram að greiða iðgjöld til félags sem hefur ekki starfsleyfi. Vátryggingartökum er ráðlagt að endurmeta valkosti sína, svo sem að hætta að greiða iðgjöld eða segja upp samningum.
Vátryggingamiðlunin Tryggingar og ráðgjöf ehf. er einn þeirra dreifingaraðila sem hefur selt tryggingar frá NOVIS hér á landi. Eins hefur íslenska félagið TRBO ehf. átt um 4 prósenta eignarhlut í NOVIS, í það minnsta á árunum 2018-2022 samkvæmt ársreikningi. Ekki liggja fyrir upplýsingar fyrir árin 2023 og 2024.
Seðlabankinn tekur fram:
„Eigendur Trygginga og ráðgjafar ehf., sem eru jafnframt ýmist núverandi eða fyrrverandi stjórnarmenn eða framkvæmdastjórar félagsins, eru eigendur TRBO ehf. í gegnum óbeint eignarhald samkvæmt nýjasta fyrirliggjandi ársreikningi síðarnefnda félagsins. Þá hefur stjórnarmaður Trygginga og ráðgjafar ehf. setið í stjórn (e. Supervisory Board) NOVIS frá árinu 2022.“
Árið 2020 voru um 5.000 Íslendingar í viðskiptum við NOVIS og greiddu um 160 milljónir á mánuði í iðgjöld. Ásgeir Jónsson, seðlabankastjóri, sagði árið 2023 að staðan vegna NOVIS væri ömurleg og óttaðist hann að mikill fjöldi íslenskra viðskiptavina hefði orðið fyrir tjóni.
Tryggingar og ráðgjöf ehf.
Hér má finna frekari upplýsingar:
Frekari upplýsingar vegna afturköllunar starfsleyfis NOVIS dags. 11. apríl 2024
Spurt og svarað um afturköllun starfsleyfis NOVIS dags. 8. júní 2023
Seðlabanki Slóvakíu afturkallar starfsleyfi NOVIS dags. 6. júní 2023
Frekari upplýsingar um ákvörðun Seðlabanka Slóvakíu vegna brota NOVIS dags. 23. febrúar 2022
Ákvörðun Seðlabanka Slóvakíu um brot NOVIS og úrbótakröfur dags. 28. apríl 2021
Upplýsingar um stöðu NOVIS dags. 25. febrúar 2021
