Íbúar í Seljahverfi í Breiðholti og Kórahverfi í Vatnsenda eru búnir að fá sig fullsadda af sífelldum sprengingum Vegagerðarinnar vegna framkvæmda við Arnarnesveg. Sagt var að sprengingum lyki um áramót en halda þær áfram og lýsa íbúar þeim sem snörpum jarðskjálftum. Vegagerðin segir áhrifin undir leyfilegum mörkum samkvæmt reglugerð. Sprengingarnar halda áfram fram á vorið.
Sprengingarnar eru gerðar vegna svokallaðra bergskerninga fyrir nýjum Arnarnesvegi. Verkið hófst á móts við Vatnsendaveg og unnið er til suðurs í átt að Rjúpnavegi. Nú er vinna í gangi til móts við Kleifakór í Kópavogi.
Í bréfi til íbúa kom fram að sprengingum myndi ljúka um áramótin. Engu að síður halda þær áfram og eru íbúar, bæði í Seljahverfi og Kórahverfi, búnir að fá nóg.
Íbúar hafa fundið vel fyrir höggunum, titringi sem sumir lýsa sem snörpum jarðskjálftum. Hafa um þetta skapast miklar umræður á samfélagsmiðlum. Dæmi eru um að myndir á veggjum hafa skekkst og hafa sumir íbúar áhyggjur af heimilum sínum vegna þess.
„Í hádeginu í dag sprakk sprengja vegna framkvæmdanna við Arnarnesveg og heimilið mitt, í Klyfjaseli, nötraði,“ sagði ein kona á laugardag og fékk mikil viðbrögð.
„Ég kom heim rétt eftir sprenginguna (heyrði restina af viðvörunarhljoðinu) en maðurinn minn sagði að þessi hefði verið mjög öflug. Við erum í Klyfjaselinu líka og hér leikur reglulega allt á reiðiskjálfi,“ segir önnur.
Einn maður greinir frá miklum sprengingum í upphafi seinustu viku, við enda Kleifakórs.
„Ég er í austurenda Kleifakórs (mjög langt frá þessu) og það hristust allar myndir á veggjum og styttur hreyfðust á borðum. Voru alveg rosaleg læti,“ segir hann.
Kvarta íbúar undan samskiptaleysi og að ekki sé tekið tillit til þeirra. Einu svörin séu þau að höggin séu undir mörkum.
„Fyrstu áætlanir gerðu ráð fyrir að ljúka þessum bergskeringum um síðustu áramót, en verkið hefur dregist meðal annars vegna þess að verktakinn ákvað að minnka hleðslu fyrir hverja sprengingu til að minnka áhrif sprenginganna á nærliggjandi hús,“ segir Sólveig Gísladóttir, sérfræðingur á samskiptadeild Vegagerðarinnar. „Nú er áætlað að verkinu ljúki í maí á þessu ári.“
Aðspurð um þessi mörk segir hún að þau séu að finna í reglugerð um sprengiefni og forefni til sprengiefnagerðar. Það er hámarksbylgjuhraða millimetra á sekúndu fyrir mannvirki. Hámarksbylgjuhraðinn vegna sprenginganna við Arnarnesveg sé 15 millimetrar á sekúndu.
Segir hún að sérstakir mælar sem mæla bylgjuhraða séu settir á hús sem næst standa sprengivinnu hverju sinni. Þessir mælar séu reglulega skalaðir samkvæmt forskrift framleiðandans. Hingað til hafa mælarnir ekki sýnt útslag sem nemi þessu hámarksgildi.
„Það getur verið mismunandi hvernig finnst fyrir titringi vegna sprenginga, klöppin er breytileg og til dæmis finnur fólk í húsum sem eru steypt á klöpp meira fyrir sprengingum en þeir sem búa í húsum sem byggð eru á malarpúða, einnig finnst meira í steyptum húsum en timburhúsum, þá skiptir hæð og lögun þeirra líka máli,“ segir Sólveig. „Vegagerðin skilur að það geti verið þreytandi að búa við truflanir af þessu tagi. Reynt er að gera það sem hægt er til að lágmarka óþægindin.“
