Fjórtán ára drengur slasaðist illa á hendi og höfði eftir að hafa tekið upp flugeld sem lá á jörðinni á skólalóð í Hafnarfirði í gær, miðvikudaginn 8. janúar. Faðir hans biðlar til fólks að sýna ábyrgð og passa upp á að hættulegir hlutir séu ekki skildir eftir eins og hráviði.
Drengurinn var á gangi með tólf ára bróður sínum og vini þeirra á skólalóð í Áslandshverfinu í Hafnarfirði þegar slysið varð. Fundu þeir stóran flugeld sem þeim sýndist vera ónotaðan eða ónýttan. Eldri bróðirinn tók flugeldinn upp sem sprakk í hendinni á honum.
Að sögn föðurins, Artiomas Maminas, slasaðist drengurinn á hendi, missti heyrn á öðru eyranu, fékk brunasár í andlitið og hárið sviðnaði af. Segir hann að sonur sinn sé heppinn að hafa haldið augunum. Einnig að hann hafi verið í góðri 66° Norður úlpu. „Hún brennur ekki og vegna þess vegna breiddist eldurinn ekki meira út,“ segir Artiomas.
Artiomas, hefur vakið athygli á málinu á samfélagsmiðlum til að vara fólk við. Biðlar hann til fullorðins fólks að sýna ábyrgð og fjarlægja flugeldana sem liggja út um allt eftir áramótin og þrettándann. Börnin geti komist í þetta.
„Á leiðinni heim sáu þeir sprengjur sem var ekki búið að sprengja, auðvitað urðu þeir forvitnir,“ segir hann við DV.
Auk þess að benda fullorðnu fólki á að sýna ábyrgð þá spyr hann einnig hvers vegna sveitarfélagið geri ekki eitthvað í þessu.
„Af hverju eru hvergi tunnur fyrir flugelda? Af hverju heldur fólk að einhverjir aðrir gangi frá? Af hverju pantar bæjarfélagið ekki bíl til að týna þetta?“ segir hann.
Aðspurður um líðan drengsins þá segir Artiomas að heyrnin sé aðeins að koma til baka. „Þetta ætlar að taka tíma. Þetta var stórt högg,“ segir hann.
