Pétur Atli Árnason hefur verið dæmdur í fimm ára og þriggja mánaða fangelsi fyrir tvö brot. Annars vegar fyrir manndrápstilraun og hins vegar fyrir hótanir og líkamsárás.

Annars vegar var ákært fyrir atvik sem átti sér stað 11. júní síðasta sumar fyrir utan hús á Vestfjörðum (nákvæmari staðsetning hreinsuð úr dómi). Var Pétur sakaður um að hafa ráðist að manni með vasahnífi og stungið hann fjórum sinnum í búk og útlimi og þannig reynt að svipta hann lífi. Við atlöguna hlaut brotaþoli lífshættulegan stunguáverka ofarlega á framanverðu hægra læri og stunguáverka á aftanverðum hægri upphandlegg, ofarlega á baki og mjóbaki.

Pétur játaði verknaðinn en neitaði sök um brotið þar sem hann bar við að hafa beitt sjálfsvörn, brotaþolinn hefði ráðist á hann fyrst. Það var mat dómara að framburður Péturs um sjálfsvörn væri ekki í samræmi við gögn málsins.

Hins vegar var Pétur ákærður fyrir brot framið um mitt sumar árið 2022. Atvikið átti sér stað í herbergi fyrir starfsmenn í Staðarskála N1 í Húnaþingi. Var Pétur sakaður um að hafa ógnað konu með hnífi með 19 cm löngu og beittu hnífsblaði, „með því að ganga upp að brotaþola með hnífinn og þannig vakið ótta hjá henni um líf og velferð og í framhaldi gripið í brotaþola, togað í hana, ýtt henni upp að vegg og hrint henni tvisvar sinnum aftur á bak svo hún féll aftur fyrir sig með þeim afleiðingum að hún hlaut eymsli á vinstri öxl og hægri mjöðm og marbletti á vinstri sköflungi, vinstri olnboga og hægri kálfa,“ eins og segir í ákæru.

Varðandi þetta brot viðurkenndi Pétur að hafa tekið upp hnífinn og beint að brotaþola en hann hafi ekki haft ásetning um að hóta konunni eða ógna henni með hnífnum. Dómara þótti sá framburður ekki vera trúverðugur.

Niðurstaðan var sakfelling og Pétur dæmdur í fangelsi í fimm ár og þrjá mánuði. Hann er jafnframt dæmdur til að greiða manninum sem hann stakk með hnífi tvær milljónir króna og konunni sem hann ógnaði í Staðaskála 300 þúsund krónur.

Dóminn, sem kveðinn var upp í Héraðsdómi Vestfjarða, má lesa hér.