Þrír létust þegar lítil sjóflugvél lenti í sjónum við Rottnest eyju í Ástralíu í gær. Dani og Svisslendingur voru á meðal látinna.

SBS greinir frá þessu.

Vélin var að gerðinni Cessna 208 Caravan 675. Talið er að hún hafi skollið utan í kletti þegar hún var að taka á loft, brotnað og fallið í sjóinn. Rottnest eyja er vestan við borgina Perth á vesturströnd Ástralíu.

„Það heyrðist mikið skvamp en engin sprengin eða neitt þannig,“ sagði ferðamaður sem varð vitni að slysinu.

Sjö manns voru um borð og létust þrjú. 60 ára gamall danskur maður, 65 ára gömul svissnesk kona og flugmaðurinn, 34 ára gamall Ástrali. Að sögn lögreglunnar gekk erfiðlega að ná líkunum úr flaki vélarinnar.

Þau sem bjargað var úr sjónum og lifðu af voru 58 ára gömul dönsk kona, 63 ára gamall svissneskur maður, og ástralskur maður og kona, 63 og 65 ára. Þau voru flutt á sjúkrahús til aðhlynningar á meiðslum sínum.

Rannsókn á slysinu stendur yfir og enn þá er verið að reyna að ná hlutum úr flakinu upp á yfirborð. „Við hugsum til fjölskyldur og vina þeirra sem létust. Þetta er óumdeilanlega mjög erfitt fyrir alla,“ sagði Roger Cook, fylkisstjóri Vestur Ástralíufylkis í dag.

Myndband náðist af slysinu og var birt í áströlsku sjónvarpi. Við vörum við myndum sem fylgja fréttinni.